కోహ్లీ.. ఐపీఎల్ నుండి తప్పుకో..!

టీమిండియా మాజీ హెడ్ కోచ్ రవిశాస్త్రి కోహ్లీకి కీలక సూచన చేశాడు. విరాట్ వెంటనే ఐపీఎల్ నుంచి తప్పుకుని విశ్రాంతి తీసుకోవాలని సూచించాడు. ఏకధాటిగా క్రికెట్ ఆడుతున్న కోహ్లీకి కాస్తంత విరామం అవసరమని అన్నాడు. మూడు ఫార్మాట్లలోనూ జట్టుకు సారథిగా వ్యవహరించిన కోహ్లీకి ఇప్పుడు విశ్రాంతి కావాలని, మైండ్‌ను ఫ్రెష్ చేసుకోవాలని సూచించాడు. తన అంతర్జాతీయ కెరియర్‌ను పొడిగించుకోవాలనుకున్నా, క్రికెట్‌లో మరో ఆరేడేళ్లపాటు ప్రయాణం ముందుకు సాగాలన్నా.. కోహ్లీ తక్షణం ఐపీఎల్ నుంచి తప్పుకోవడం మంచిదని రవిశాస్త్రి అభిప్రాయపడ్డాడు. టీమిండియాకు ఆడాలనుకునే వారు ఎవరైనా సరే ఓ గీత గీసుకోవాలని, టీమిండియాకు మ్యాచ్‌లు లేనప్పుడు విశ్రాంతి తీసుకోవాలని అన్నాడు. అంతర్జాతీయ ఆటగాడిగా అత్యున్నత స్థాయికి చేరుకోవాలంటే కఠినమైన నిర్ణయాలు తీసుకోవాలని రవిశాస్త్రి సూచించాడు.