ధోనికి కెప్టెన్సీ అప్పజెప్పగానే.. చెన్నై సూపర్ విక్టరీ

203 పరుగుల విజయ లక్ష్యాన్ని ఛేదించే క్రమంలో 20 ఓవర్లలో 6 వికెట్లు కోల్పోయి 189 పరుగులు మాత్రమే చేసింది సన్ రైజర్స్. 13 పరుగుల తేడాతో ఓటమి పాలైంది. ఓపెనర్లు అభిషేక్ శర్మ (39)-కెప్టెన్ కేన్ విలియమ్సన్ (47) తొలి వికెట్‌కు 58 పరుగుల భాగస్వామ్యం జోడించారు. అభిషేక్ అవుటైన తర్వాత క్రీజులోకి వచ్చిన రాహుల్ త్రిపాఠి గోల్డెన్ డక్‌గా వెనుదిరిగాడు. మార్కరమ్ 17 పరుగులు మాత్రమే చేసి అవుటయ్యాడు. వరుస బంతుల్లో మిచెల్ శాంట్నర్ కు రెండు సిక్సర్లు కొట్టిన మార్కరమ్.. ఆ తర్వాత జడేజాకు క్యాచ్ ఇచ్చి వెనుదిరిగాడు. పూరన్ 33 బంతుల్లో 3 ఫోర్లు, 6 సిక్సర్లతో 64 పరుగులు చేసి విజయంపై ఆశలు రేపాడు. అయితే, శశాంక్ సింగ్ (15), వాషింగ్టన్ సుందర్(2) ఆఖర్లో విఫలమయ్యారు. ఫలితంగా 20 ఓవర్లలో ఆరు వికెట్ల నష్టానికి 189 పరుగులు మాత్రమే చేసి ఓటమి పాలైంది. చెన్నై బౌలర్లలో ముకేశ్ చౌదరి 4 ఓవర్లు వేసి 46 పరుగులిచ్చి 4 వికెట్లు పడగొట్టాడు. రుతురాజ్ గైక్వాడ్ కు ప్లేయర్ ఆఫ్ ది మ్యాచ్ అవార్డు లభించింది.