బన్నీ తో అనుకుంటే.. తమ్ముణ్ణి తగిలించారే!

ప్రస్తుతం దర్శకుడు మార్టుతి మూడ్ మొత్తం అల్లు అర్జున్ మీదే ఉంది. విక్రమ్ కుమార్ కి కనెక్ట్ అవని అల్లు అర్జున్ తనకి కనెక్ట్ అవుతాడు అనుకుంటే... త్రివిక్రమ్ తో కనెక్ట్ అయ్యి త్రివిక్రమ్ తో సినిమా చేసేందుకు సిద్ధపడుతున్నాడు. మరి అల్లు అర్జున్ కోసం మంచి కథని ప్రిపేర్ చేస్తున్న మారుతికి అలా త్రివిక్రమ్ అడ్డం పడ్డాడు. ఇక అల్లు అర్జున్ తో ఎలాగైనా సినిమాని తెరకెక్కించాలని భావిస్తున్న మారుతికి ఇప్పుడు మరో మెగా హీరోని తగిలించిందట గీత ఆర్ట్స్. అల్లు అర్జున్ కూడా మారుతీ మంచి కథ పట్టుకొస్తే సినిమా చేద్దామనే అనుకున్నాడు. కానీ నా పేరు సూర్య దెబ్బకి అల్లు అర్జున్ ఎలాంటి సాహసాలు చెయ్యలేక త్రివిక్రంతోనే సినిమా చేస్తున్నాడు.

మరి మారుతి తో తాను సినిమా చెయ్యకపోతేనేని తన తమ్ముడితో చెయ్యమన్నాడట. అదివరకే అల్లు శిరీష్ తో మారుతీ కొత్త జంట చేసాడు. కానీ ఆ సినిమా సో సో ఫలితాన్నే ఇచ్చింది. ఇక అల్లు శిరీష్ కూడా గట్టి హిట్ కొట్టి స్టార్ హీరో అవ్వాలనే కల కంటున్నాడు కానీ... అల్లు శిరీష్ కి గట్టి హిట్ ఇచ్చే దర్శకుడే తగలడం లేదు. అయితే ఇప్పుడు గీత ఆర్ట్స్ లో అల్లు అరవింద్ మారుతీ ని పిలిచి అల్లు శిరీష్ ని స్టార్ హీరో ని చేసే బాధ్యతని అప్పగించాడట. అల్లు శిరీష్ కు హిట్ ఇవ్వమని అల్లు అర్జున్ కూడా మారుతీ ని కోరాడట. ఇక అల్లు అర్జున్ తో తర్వాత చేద్దామనుకున్న మారుతీ, అల్లు శిరీష్ కోసం జాతి రత్నం టైటిల్ తో ఓ కథ రెడీ చేసాడట. ఇప్పటికే స్క్రిప్టు వర్క్ పూర్తైందని... కానీ టైటిల్ మరీ ఎటకారంగా ఉందని... మారిస్తే బాగుంటుందని ఆలోచిస్తున్నారట. ఇక ఈ కథను మారుతీ ఎప్పటిలాగే తన జోనర్ అదేనండి కామెడీ జోనర్ లోనే సిద్ధం చేస్తున్నాడట.

అల్లు శిరీష్ ప్రస్తుతం ఏబిసిడి రీమేక్ లో నటిస్తున్నాడు. ఆ సినిమా దాదాపుగా ఫినిషింగ్ దశలో ఉంది. ఇక అల్లు శిరీష్ గత చిత్రం ఒక్క క్షణం బావున్నప్పటికీ... ఆ సినిమా శిరీష్ ని సంతృప్తి పెట్టలేకపోయింది. ఇక తాజాగా చేస్తున్న ఏబిసిడి రీమేక్ కావటంతో... క్రేజ్ కూడా బావుండడంతో ఇప్పటికే శాటిలైట్ డీల్ క్లోజ్ కావడంతో నిర్మాతలు హ్యాపీగా ఉన్నారట. ఇక శిరీష్ ఈ చిత్రం పూర్తికాగానే మారుతీ - అల్లు శిరీష్ సినిమా పట్టాలెక్కుతుందట.