ప్రభుత్వాల జోక్యంపై నటుడు సిద్ధార్థ్ అసంతృప్తి

"25 సంవత్సరాల క్రితం మొదటిసారి నా స్టూడెంట్ ఐడీకార్డు ఉపయోగించి విదేశాల్లో సినిమా చూశాను. అప్పట్లోనే సినిమా చూసేందుకు 8 డాలర్లు అంటే సుమారుగా రూ.200 సినిమా కోసం ఖర్చు చేశాను. అప్పటి సినిమాల కన్నా ఇప్పటి సినిమాలు ఏమాత్రం తక్కవ కాదు. నిజానికి ప్రస్తుతం మనం నిర్మిస్తున్న చిత్రాలు టెక్నాలజీ, టాలెంట్‌లో మిగతా దేశాల సినిమాలకు ఏమాత్రం తీసిపోకుండా ఉంటున్నాయి. సినిమా టికెట్లు, పార్కింగ్‌ రేట్లపై ప్రభుత్వాలు, రాజకీయ నాయకులకు ఎలాంటి హక్కు లేదు. సినిమా కంటే మద్యం, పొగాకుకు మీరు ఎక్కువ గౌరవమిస్తున్నారు. నియంత్రించాలనుకుంటే వాటి ధరలను నియంత్రించండి. అంతేగాని ఎన్నో వేలమంది ప్రజలు ఆధారంగా జీవిస్తున్న సినీ పరిశ్రమను టార్గెట్ చేయకండి. పన్నులు, సెన్సార్ విషయంలో మీరు ఏం చెప్పినా వింటున్నాం.

అలాగని మా వ్యాపారం ఎలా చేసుకోవాలో మీరు మాకు నేర్పనక్కర్లేదు. మాకు తెలుసు.. మా వ్యాపారం ఎలా చేసుకోవాలో. మీకు ఆదాయం కావాలనుకుంటే ప్రతి పరిశ్రమలోనూ ఎంతో మంది సంపన్నులున్నారు.. వాళ్ల నుంచి కూడా తీసుకోండి. సినిమా బడ్జెట్‌ అనేది కొనుగోలుదారుడిపై ఆధారపడదు. ఆ సినిమా దర్శకుడు, నిర్మాతపై ఆధారపడి ఉంటుంది. సినిమా ద్వారా ఎవరు ఎంత సంపాదిస్తారో నిర్ణయించే హక్కు ఏ ఒక్కరికీ లేదు. పేదరికం నుంచి వచ్చి ధనికులుగా రాణిస్తున్న రాజకీయనాయకులను ప్రశ్నించగలరా? పరిశ్రమను వేధించడం ఇకనైనా ఆపండి. మనకి తిండి పెడుతున్న రైతులు ఎంత గొప్పవాళ్లో మనందరికీ తెలుసు.. ఇప్పటికే వాళ్ల కోసం మేము పోరాటం చేశాం. మేము రైతులంత గొప్పవాళ్లం కాకపోవచ్చు. కానీ మేము కూడా మనుషులం, పన్నుచెల్లింపుదారులం" అంటూ నటుడు సిద్ధార్థ్ ప్రభుత్వాల తీరుపై ఆగ్రహం వ్యక్తం చేశారు.