తండేల్ మూవీపై రాఘవేంద్ర రావు ప్రశంసలు.. అద్భుతమైన ప్రేమకథ!

అక్కినేని నాగచైతన్య, సాయి పల్లవి జంటగా చందు మొండేటి దర్శకత్వంలో రూపొందిన 'తండేల్' చిత్రం ఫిబ్రవరి 7న విడుదలై విజయవంతమైంది. గీతా ఆర్ట్స్ బ్యానర్‌పై బన్నీ వాసు నిర్మించిన ఈ చిత్రానికి దేవి శ్రీ ప్రసాద్ సంగీతం అందించారు. నాగచైతన్య, సాయి పల్లవి నటన, వారి కెమిస్ట్రీ, దేవి శ్రీ ప్రసాద్ సంగీతం ప్రేక్షకుల ప్రశంసలు పొందుతున్నాయి.

సీనియర్ దర్శకుడు రాఘవేంద్రరావు ఈ చిత్రాన్ని వీక్షించి, తన అభిప్రాయాన్ని ఎక్స్ వేదికగా పంచుకున్నారు. "చాలా రోజులకు తండేల్ వంటి అద్భుతమైన ప్రేమకథను చూశాను. నాగచైతన్య, సాయి పల్లవి పోటీపడి నటించారు. చందు మొండేటి తీసుకున్న కథ, దాని నేపథ్యం సాహసోపేతమే. షాట్ మేకింగ్‌పై దర్శకుడి శ్రద్ధ బాగుంది. ఈ చిత్రంతో విజయాన్ని అందుకున్న గీతా ఆర్ట్స్‌కు అభినందనలు. ఒక్క మాటలో ఇది ఒక దర్శకుడి సినిమా" అని రాసుకొచ్చారు.

సీనియర్ దర్శకుడి ప్రశంసలు తమ చిత్రానికి రావడం పట్ల నాగచైతన్య సంతోషం వ్యక్తం చేశారు.