శ్రీదేవిగా మారుతున్న రకుల్..!
ఒకప్పుడు టాలీవుడ్, కోలీవుడ్, బాలీవుడ్ లో ఒక ఊపు ఊపిన అందాల తార శ్రీదేవి కాలం చేసి కొన్నినెలలు గడుస్తున్నాయి. అయితే శ్రీదేవి చనిపోయినా.. ఆమె ముచ్చట్లు మాత్రం ఇంకా టాలీవుడ్ సర్కిల్స్ లో వినబడుతూనే ఉన్నాయి. ఎందుకంటే ఎన్టీఆర్ బయోపిక్ అయిన ఎన్టీఆర్ కథానాయకుడులో రకుల్ ప్రీత్.. శ్రీదేవిగా నటించబోతుంది. ఈ సినిమా మీద ఎన్ని అంచనాలున్నాయో ఇందులో నటిస్తున్న నటుల పాత్రలపై అన్నే అంచనాలున్నాయి. ఇప్పటికే ఎన్టీఆర్ గా బాలకృష్ణ లుక్, చంద్రబాబుగా రానా లుక్, ఏఎన్నార్ గా సుమంత్ లుక్ ప్రేక్షకులను విపరీతంగా ఆకట్టుకుంది. ఇక ఇపుడు ఆ సినిమాలో శ్రీదేవిగా నటిస్తున్న రకుల్ ప్రీత్ వంతు. ప్రస్తుతం చేతిలో టాలీవుడ్ అవకాశాలు లేని ఈ భామ శ్రీదేవి పాత్రతో మరోసారి ప్రేక్షకుల ముందుకు రాబోతుంది.
అచ్చం శ్రీదేవిలా...
ఇక రకుల్ ప్రీత్ అందం, ఆమె చీర కట్టు అన్నీ శ్రీదేవి పోలికలతో ఉండడంతో దర్శకుడు క్రిష్ ఆమెని ఎన్టీఆర్ బయోపిక్ కోసం శ్రీదేవి పాత్రకి సెలెక్ట్ చేసాడు. అయితే శ్రీదేవి పాత్రలో నటించడం ఒక ఛాలెంజ్ అంటోంది రకుల్. ఎన్టీఆర్ తో శ్రీదేవి మనవరాలిగా, హీరోయిన్ గా నటించిన రికార్డు సృష్టించింది. ఒక సినిమాలో ఎన్టీఆర్ కి మనవరాలుగా చేసిన శ్రీదేవి మళ్లీ 14 ఏళ్లకే ఎన్టీఆర్ పక్కన హీరోయిన్ గా జోడి కట్టడం అప్పట్లో పెద్ద సెన్సేషన్. ప్రస్తుతం శ్రీదేవి పాత్రలోకి పరకాయ ప్రవేశం చేయడానికి శ్రీదేవి స్టయిల్, మేనరిజం అన్నీ నేర్చుకుంటుందట రకుల్. ఎప్పుడూ శ్రీదేవి ని సినిమాల్లోనూ, ఏదైనా అవార్డుల ఫంక్షన్స్ లో టీవీలో చూడడం తప్ప రకుల్ ప్రత్యక్షం గా చూడలేదట. అందుకే శ్రీదేవి రోల్ చెయ్యడానికి శ్రీదేవిలా మారడానికి ఆమె అన్నీ నేర్చుకుంటుందట.
