తన పాత హీరోయిన్ ని డైరెక్ట్ చేస్తున్న హీరో

షమితాబ్, త్రీ, రఘువరన్ బి.టెక్, అనేకుడు వంటి చిత్రాలతో అత్యద్భుతమైన నటుడిగా పేరు ప్రఖ్యాతలు సంపాదించుకున్నాడు తమిళ కథానాయకుడు ధనుష్. నటుడిగా తమిళంలోనే కాక తెలుగు, మళయాళ ప్రేక్షకులకు చేరువ అయ్యాడు. కథానాయకుడిగా కెరీర్ పీక్స్ లో వుంది. ఇలాంటి తరుణంలో సేఫ్ జోన్ నుంచి బైటకి వచ్చి మెగాఫోన్ పట్టే సాహసం చేస్తున్నాడు ధనుష్. ఆయన దర్శకత్వంలో తమిళంలో ఒక చిత్రం తెరకెక్కబోతుంది. ఇప్పటివరకు నటన, నిర్మాణం, రచన, సాహిత్యంలో తన ప్రావీణ్యం చూపి మెప్పు పొందిన ధనుష్ ఇప్పుడు అన్ని క్రాఫ్ట్స్ పై కమాండ్ పెంచుకుని దర్శకత్వం వహించబోతున్నాడు.

పవర్ పాండి అనే తమిళ చిత్రానికి దర్శకత్వం వహించటానికి రంగం సిద్ధం చేసుకుంటున్నాడు ధనుష్. ఈ చిత్రంలో లీడ్ రోల్ కోసం ఇప్పటికే పాత తరం నటుడు రాజ్ కిరణ్ కాల్ షీట్స్ బుక్ చేసుకున్నాడు. గత కొద్ది రోజులుగా కథానాయిక పాత్ర కోసం అన్వేషణ సాగిస్తున్న ధనుష్ ఎట్టకేలకు తనతో తిరుడా తిరుడి చిత్రంలో కలిసి నటించిన ఛాయా సింగ్ కి కథానాయిక పాత్ర ఆఫర్ చేసాడు ధనుష్. ఎప్పుడో 2003 లో వచ్చిన తిరుడా తిరుడి చిత్రంలో మన్మధ లాసా అంటూ ధనుష్ ఛాయా సింగ్ లు చేసిన సందడి ఇంకా ప్రేక్షకులకు జ్ఞాపకమే. ఇప్పుడు ఆ హీరోయిన్ ని డైరెక్ట్ చేయబోతున్నాడు ఈ హీరో. ఇదే చిత్రంలో ధనుష్ ఒక అతిధి పాత్రలో మెరవనున్నాడని సమాచారం.