మరోసారి ఉద్రిక్తతలు.. భారత్ లో మరో వంతెన ఏర్పాటు చేసుకున్న చైనా

భారత్-చైనా సరిహద్దుల్లో మరోసారి ఉద్రిక్త పరిస్థితులు మొదలయ్యాయి. భారత్‌లో దురాక్రమించిన ప్రాంతంలోనే చైనా వారధిని నిర్మించిందని విదేశీ వ్యవహారాల మంత్రిత్వ శాఖ(ఎంఈఏ) అధికార ప్రతినిధి అరిందమ్‌ బాగ్చీ స్పష్టం చేశారు. ఇన్నాళ్లూ చైనా నిర్మించిన తొలి వారధి అసలు వారధి కాదని, ఇప్పుడు వెలుగులోకి వచ్చిన పెద్ద వారధి నిర్మాణం కోసం కట్టినదని రక్షణ శాఖ వర్గాలు వివరించాయి. ప్యాంగాంగ్ సరస్సుపై చైనా నిర్మిస్తున్న రెండో వంతెన 1960 నుంచి ఆ దేశం అక్రమంగా ఆక్రమించుకున్న ప్రాంతంలో ఉందని భారత్ శుక్రవారం స్పష్టం చేసింది. చైనా దాని మునుపటి వంతెనతో పాటు పాంగోంగ్ సరస్సుపై వంతెనను నిర్మిస్తున్నట్లు మేము నివేదికలను చూశామని.. ఈ రెండు వంతెనలు 1960 నుంచి చైనా ఆక్రమణలో కొనసాగుతున్న ప్రాంతాలలో ఉన్నాయని బాగ్చి వెల్లడించారు. జమ్మూకాశ్మీర్, లడఖ్ కేంద్రపాలిత ప్రాంతాలు భారతదేశంలో అంతర్భాగమని మేము అనేక సందర్భాల్లో స్పష్టం చేసామన్నారు ఇతర దేశాలు భారతదేశ సార్వభౌమాధికారం, ప్రాదేశిక సమగ్రతను గౌరవిస్తాయని మేము ఆశిస్తున్నామని అరిందమ్ బాగ్చి స్పష్టం చేశారు. దేశం భద్రతా ప్రయోజనాలను పూర్తిగా పరిరక్షించేలా చూసేందుకు ప్రభుత్వం ముఖ్యంగా 2014 నుంచి సరిహద్దు మౌలిక సదుపాయాల అభివృద్ధిని వేగవంతం చేసిందని, ఇందులో రోడ్లు, వంతెనల నిర్మాణం కూడా ఉన్నాయని బాగ్చి తెలిపారు.