దుర్గ్-పూరీ ఎక్స్ ప్రెస్ లో మంటలు

తాజాగా మరో ఎక్స్ ప్రెస్ రైలులో మంటలు చెలరేగాయి. దుర్గ్-పూరీ ఎక్స్ ప్రెస్ రైలు ఏసీ బోగీ కింది భాగంలో మంటలు చెలరేగాయి. నౌపడ జిల్లాలోని ఖరియార్ రైల్వే స్టేషన్ సమీపంలో ఈ ఘటన చోటు చేసుకుంది. 18426 నంబర్ రైలు గురువారం సాయంత్రం ఛత్తీస్ గఢ్ లోని దుర్గ్ నుంచి ఒడిశాలోని పూరీకి బయలుదేరింది. రాత్రి 10.07 గంటల సమయంలో ఖరియార్ రైల్వే స్టేషన్ సమీపంలో ఏసీ బోగీలోంచి పొగలు వచ్చి.. చక్రాల కింద మంటలు వ్యాపించాయి. ప్రయాణికులు అప్రమత్తమై వెంటనే చైన్ లాగి రైలును ఆపివేయడంతో పెను ప్రమాదం తప్పింది. అధికారులు వెంటనే స్పందించి మంటలను అదుపు చేశారు. బీ3 కోచ్ కింది భాగంలో మంటలు చెలరేగినట్లు ఈస్ట్ కోస్ట్ రైల్వే అధికారులు వెల్లడించారు. చక్రాల వద్ద ఉన్న బ్రేక్స్ జామ్ కావడం వల్ల రాపిడికి గురై మంటలు వచ్చాయని అధికారులు నిర్ధారించారు. మంటలను ఆర్పివేశాక బ్రేక్స్ ను సరిచేయడంతో దుర్గ్-పూరీ ఎక్స్ ప్రెస్ రైలు రాత్రి 11 గంటల సమయంలో పూరీకి బయలుదేరింది.