Farmers Agitation : రైతులు పోలీసులు మధ్య యుద్ధ వాతావరణం.. రైతన్నల మరో కార్యాచరణ

కాగా రైతులు రోడ్డుపైనే బైఠాయించడంతో ట్రాఫిక్ ఇబ్బందులు ఏర్పడ్డాయి. దీంతో ట్రాఫిక్ సమస్యలు ఏర్పడకుండా ఆందోళన చేసుకోవాలని కేంద్ర ప్రభుత్వం కోరింది. ట్రాఫిక్ సజావుగా సాగేందుకు సహకరించాలని విజ్ఞప్తి చేసింది. చర్చల ద్వారానే సమస్యను పరిష్కరించుకోవాలని, ఆందోళన పేరుతో ప్రజలను ఇబ్బంది పెట్టవద్దని కేంద్ర ప్రభుత్వం కోరింది. రైతులతో చర్చించడానికి ఇరవై నాలుగు గంటలూ ప్రభుత్వం సిద్ధంగా ఉందని ప్రకటించింది. అయినా రైతు సంఘాలు మాత్రం తమ డిమాండ్లను పరిష్కరించాలని కోరుతున్నాయి. తాము కూడా చర్చలకు సిద్ధమేనని, ముందు ప్రధాన డిమాండ్లకు సంబంధించి స్పష్టత ఇవ్వాలని రైతు సంఘాలు కోరుతున్నాయి.

మార్కెట్‌ వడిదుడుకులతో సంబంధం లేకుండా కనీస మద్దతు ధరకు భరోసా కల్పిస్తూ చట్టం చేయాలని, 2020-21 ఉద్యమ సమయంలో రైతులపై పెట్టిన కేసులను ఎత్తివేయాలని, గతంలో చేపట్టిన ఆందోళనల్లో మరణించిన రైతుల కుటుంబాలకు పరిహారం అందించాలని, వివాదాస్పద విద్యుత్తు చట్టం-2020ని రద్దు చేయాలని, కేంద్రం విద్యుత్‌ రంగాన్ని ప్రైవేటుపరం చేయకూడదని, భూసేకరణ చట్టం-2013ని పునర్వ్యవస్థీకరించడం, వరల్డ్‌ ట్రేడ్‌ ఆర్గనైజేషన్‌ నుంచి వైదొలగడం వంటి డిమాండ్లను రైతులు చేస్తున్నారు. వీటిలో కొన్నింటికి కేంద్ర ప్రభుత్వం ఆమోదం తెలిపినా వారికి చట్టం రూపం తేలేదు. అందుకే మరోసారి రైతులు ఉద్యమిస్తున్నారు.