రైలు ప్రమాదం.. కాలిపోయిన నోట్ల కట్టలు

మధురై రైల్వే స్టేషన్ సమీపంలో నిలిపి ఉంచిన అద్దె టూరిస్ట్ బోగీలో శనివారం తెల్లవారుజామున జరిగిన అగ్నిప్రమాదంలో ముగ్గురు మహిళలు సహా ఉత్తరప్రదేశ్ కు చెందిన తొమ్మిది మంది పర్యాటకులు మరణించారు. మరో 8 మందికి గాయాలయ్యాయి. ఆగస్టు 17న లక్నో నుంచి బయలుదేరిన ప్రైవేట్ టూర్ ప్యాకేజీలో భాగంగా ఆగస్టు 29న తిరిగి రావాల్సిన బోగీలో మంటలు చెలరేగాయి. మొత్తం 55 మంది టూరిస్టులతో పాటు టూర్ ఆపరేటర్ కు చెందిన ఎనిమిది మంది సహాయక సిబ్బంది బోగీలో ఉన్నారు. ఈ ప్రమాదానికి కారణమైన వంటగ్యాస్ సిలిండర్ ను అక్రమంగా తరలించిన టూర్ ఆపరేటర్ పై రైల్వే పోలీసులు క్రిమినల్ కేసు నమోదు చేశారు. టూరిస్ట్ బోగీలో వంటగ్యాస్ సిలిండర్ ను టూర్ ఆపరేటర్ అక్రమంగా త‌ర‌లించిన కేసులో ఐపీసీ, రైల్వే చట్టంలోని వివిధ సెక్షన్ల కింద జీఆర్ పీ క్రిమినల్ కేసు నమోదు చేసినట్లు దక్షిణ రైల్వే ఒక ప్రకటనలో తెలిపింది. అగ్నిప్రమాదం జరిగిన వెంటనే ఇద్దరు వ్యక్తులు అదృశ్యమయినట్టు పోలీసులు గుర్తించారు. వీరి కోసం ప్రత్యేక బలగాలతో సెర్చ్ ఆపరేషన్ నిర్వహిస్తున్నారు.