Kerala : కేరళ వెళ్తున్నారా? అయితే జాగ్రత్త... వైరస్‌లున్నాయ్ అలెర్ట్‌గా ఉండాల్సిందే

తాజాగా కేరళలో మంకీ పాక్స్ వణికిస్తుంది. దీంతో సరిహద్దు రాష్ట్రాలు కూడా అప్రమత్తమయ్యాయి. ఒకే వ్యక్తిలో మంకీపాక్స్ తో పాటు నిఫా వైరస్ ను కూడా వైద్యులు గుర్తించడంతో కేరళ ప్రభుత్వం అలెర్ట్ అయింది. కేరళ సరిహద్దు రాష్ట్రాలైన తమిళనాడు, కర్ణాటకల్లోనూ హై అలెర్ట్ ను ప్రకటించాయి.తమ బోర్డల్ లో తనిఖీలు చేస్తున్నాయి. కేరళలోని మలప్పురం జిల్లాకు చెందిన ఒక వ్యక్తి మంకీపాక్స్‌ లక్షణాలతో ఆస్పత్రిలో చేరారు. మంజేరీ ఆస్పత్రిలో చికిత్స పొందుతున్న అతని శాంపిల్స్‌ను కోజికోడ్‌ వైరాలజీ ల్యాబ్‌కు పంపగా.. పాజిటివ్‌గా తేలిందని వైద్య శాఖ అధికారులు చెబుతున్నారు. కేరళలో రెండో మంకీపాక్స్ నమోదయింది.

అయితే మంకీపాక్స్ సోకిన వ్యక్తితో సంబంధం ఉన్న వారిని కూడా కేరళ ప్రభుత్వం గుర్తించి వారిని ఐసొలేషన్ కు తరలించి చికిత్స ను అందిస్తుంది. ఈ నెల 9వ తేదీన మంకీపాక్స్ కేసు నమోదు కాగా, మరో వైపు నిఫా వైరస్ కూడా కేరళను కుదిపేస్తుంది. ఒక వ్యక్తికి నిఫా వైరస్ సోకడంతో అతనిని కలసిన దాదాపు మూడు వందల మంది వరకూ ఐసోలేషన్‌కు తరలించింది. కేరళకు ఎక్కువ మంది విదేశాల నుంచి వస్తుండటం వల్లనే వైరస్ లు ఎక్కువగా వస్తున్నాయని వైద్య నిపుణులు అభిప్రాయపడుతున్నారు. కేరళ నుంచి వస్తున్న వారిని పూర్తిగా వైద్యపరీక్షలు నిర్వహించిన తర్వాత మాత్రమే రాష్ట్రంలోకి అనుమతిస్తున్నారు. ఇందుకోసం నాగర్‌కోయిల్ లో ప్రత్యేకంగా మెడికల్ క్యాంప్స్ ను ఏర్పాటు చేస్తున్నారు. కేరళ నుంచి వచ్చే వాహనాలను క్షుణ్ణంగా తనిఖీలు చేస్తున్నారు. కేరళ వెళ్లే వారు తగిన జాగ్రత్తలు తీసుకోవాలన్న సూచనలు వైద్య నిపుణులు వెల్లడిస్తున్నారు.