భారత్ కు వస్తున్నానని చెప్పిన సీమా హైదర్ మొదటి భర్త

యూట్యూబ్ ఛానల్ కు ఇంటర్వ్యూ ఇచ్చిన.. గులాం హైదర్‌ తన మాజీ భార్య సీమా హైదర్ పై తీవ్ర విమర్శలు చేయడమే కాకుండా.. ఆమె మానసికంగా అస్థిరంగా ఉందని ఆరోపించాడు. వీలైతే ఆమెను కటకటాల వెనక్కి నెట్టాలని కోరారు. సీమాను భారత్ లోనే ఉంచుకుని తన పిల్లలను పాకిస్థాన్‌కు పంపించాలని ప్రధాని మోదీ, యూపీ సీఎం యోగి ఆదిత్యనాథ్‌లకు విజ్ఞప్తి చేశారు. “ఆమె మంచి పాకిస్థానీ కాలేకపోయింది. ఆమె తన మతాన్ని, తన దేశాన్ని విడిచిపెట్టింది. అలాంటిది ఆమెను ఎలా నమ్మగలం. నాకు భారత్‌పై ఎలాంటి వ్యతిరేకత లేదు. నేను భారతదేశాన్ని గౌరవిస్తాను. కానీ నా పిల్లలను పాకిస్తాన్ వ్యతిరేక నినాదాలు చేయమని బలవంతం చేయడం సరికాదు, ” అని గులాం హైదర్ అన్నాడు. సీమా తరపున వాదిస్తున్న న్యాయవాదిపై కూడా విమర్శలు చేశాడు గులాం హైదర్. రెండు దేశాల మధ్య గొడవ పెట్టడానికి లాయర్ ప్రయత్నిస్తున్నాడని ఆరోపించాడు. “ఏపీ సింగ్ చేస్తున్న పనులు ఏ మాత్రం ఆమోదయోగ్యం కాదు. హిందువులు, ముస్లింల మధ్య గొడవలు సృష్టించేందుకు ప్రయత్నిస్తున్నారని" అన్నాడు గులాం.