పవన్‌ ఓడించాలంటే వాలంటీర్ చాలు: మంత్రి జోగి

ఆంధ్రప్రదేశ్‌లో రాజకీయం మాంచి కాక మీద ఉంది. వాలంటీర్లపై జనసేన అధినేత పవన్ కళ్యాణ్ చేసిన వ్యాఖ్యలు తీవ్రంగా కొట్టొచ్చినట్లు కనిపిస్తున్నాయి. గ్రామ వాలంటీర్లు పెద్దఎత్తున ఆందోళనలు చేసి రాష్ట్రవ్యాప్తంగా నిరసనలకు దిగారు. పవన్‌కి ఏపీ మహిళా కమిషన్ నోటీసులు జారీ చేసింది. అయినా పవన్‌ని ఏదీ ఆపలేదు. అధికార పార్టీపై విమర్శలు చేయడం ఏమాత్రం ఆపడం లేదు. ఈ నేపథ్యంలో రాష్ట్ర మంత్రులు ఒకరి తర్వాత ఒకరుగా స్పందిస్తున్నారు. పవన్ కళ్యాణ్‌పై వైఎస్సార్‌సీపీ వాలంటీర్‌ను రంగంలోకి దింపుతుందని, కేవలం వాలంటీర్‌తోనే ప్రత్యక్ష ఎన్నికల్లో పవన్‌ను ఓడించడం ఖాయమని గృహనిర్మాణ శాఖ మంత్రి జోగి రమేష్ అన్నారు.

కోనసీమ జిల్లా ముమ్మిడివరంలో నియోజకవర్గ సమావేశానికి హాజరైన రమేష్.. ఈ వ్యాఖ్యలు చేశారు. వాలంటీర్లు స్థానికులని, స్థానిక ప్రజల అవసరాలను తీర్చడానికి నియమించబడ్డారని ఆయన అన్నారు. గ్రామ వాలంటీర్లను సంఘ విద్రోహులుగా, మహిళా ట్రాఫికర్లుగా పవన్ కళ్యాణ్ అభివర్ణిస్తున్నారని, ఇది నిజం కాదని మంత్రి రమేష్ అన్నారు. వాలంటీర్లపై పవన్ చేసిన వ్యాఖ్యలు ఆయన స్వభావాన్ని ప్రతిబింబిస్తున్నాయని రమేష్ అన్నారు. ప్రజాస్వామ్య వ్యవస్థలను ధ్వంసం చేసిన ఘనత సీబీఎన్‌కే దక్కుతుందని మాజీ సీఎం చంద్రబాబును విమర్శించారు. అధికారంలోకి వస్తే గ్రామ వాలంటీర్లను తొలగిస్తామని చంద్రబాబు నాయుడు, నారా లోకేష్, పవన్ కళ్యాణ్ చెబుతున్నారని మంత్రి అన్నారు.

పవన్ కళ్యాణ్ కు దమ్ము ఉంటే నేరుగా ఎన్నికల్లో పోటీ చేయాలని సవాల్ విసిరారు. తమకు తగినంత బలం లేకపోవడంతో టీడీపీ, జనసేన కలిసి సీఎం జగన్‌పై పోటీ చేస్తున్నాయని రమేష్ అన్నారు. వచ్చే ఎన్నికల్లో సీఎం జగన్ మళ్లీ అధికారంలోకి వస్తారని అన్నారు. వాలంటీర్లపై కొంతమంది విషం చిమ్ముతున్నారని మాజీ మంత్రి ఆళ్ల నాని మండిపడ్డారు. ప్రతిపక్షాల కుట్రలను అర్థం చేసుకుని తిప్పికొట్టాలన్నారు. చంద్రబాబు ఇచ్చిన స్క్రిప్ట్‌ని పవన్‌ చదువుతున్నారని, వాలంటీర్‌ వ్యవస్థని అధ్యయనం చేయకుండా ఇష్టానుసారంగా మాట్లాడుతున్నారని దుయ్యబట్టారు. వాలంటీర్ల తల్లిదండ్రులు సైతం బాధ పడేలా పవన్‌ వ్యాఖ్యలు చేస్తున్నారని ఫైర్‌ అయ్యారు. పవన్‌ అసత్యాలు పలకడం మానుకోవాలని, వాలంటీర్ల జోలికి వస్తే ఊరుకోమని ఆళ్ల నాని హెచ్చరించారు.