తెలంగాణలో బీజేపీ సీఎం ఫేస్ ఎవరు?

భారతీయ జనతా పార్టీ పలువురు బలమైన నాయకులు ఉన్నారు. అయితే ముఖ్యమంత్రి అభ్యర్థికి సంబంధించి కీలక ప్రకటన రావాల్సి ఉంది. అలా చేస్తేనే ప్రజలలో కూడా పార్టీకి మైలేజ్ వస్తుంది. ఇక సెప్టెంబర్‌లో యాత్రలకు బీజేపీ శ్రీకారం చుట్టింది. బీజేపీ రాష్ట్ర అధ్యక్షుడు జి. కిషన్ రెడ్డి, హుజూరాబాద్ ఎమ్మెల్యే ఈటల రాజేందర్, పార్టీ జాతీయ ఉపాధ్యక్షురాలు డి.కె. అరుణ సెప్టెంబర్ 17 నుంచి బస్సు యాత్రలను చేపట్టనున్నారు.

కేంద్ర హోంమంత్రి అమిత్ షా ఖమ్మంలో బహిరంగ సభ నిర్వహించాలని భావిస్తున్నారు. అయితే బీజేపీ ముఖ్యమంత్రి ఫేస్ ఎవరో ఆగస్టు 27 నాటికి స్పష్టత వస్తుందని నాయకులు ఆశాభావం వ్యక్తం చేస్తున్నారు. అమిత్ షా బహిరంగ సభకు హాజరుకావడం, రాష్ట్ర పార్టీ నేతలతో చర్చలు జరిపే అవకాశం వల్ల పార్టీ సీఎం ముఖంపై కీలక ప్రకటన రానుంది. పార్టీలో అంత మంది కీలక నేతలు ఉన్నా.. ఒక్క వ్యక్తికి సంబంధించిన నాయకత్వం గురించి కూడా బీజేపీలో చర్చ జరుగుతూ ఉంది. తాము అనుసరించాల్సిన నాయకుడు ఎవరు? అనే విషయం కూడా బీజేపీ కార్యకర్తల్లో ఒక క్లారిటీ రావాలని బీజేపీ నేతలు అంటున్నారు. ఓ వైపు లోక్ సభ ఎన్నికలలో మోదీని తిరిగి అధికారంలో కూర్చోపెట్టాలని బీజేపీ భావిస్తూ ఉండగా.. అసెంబ్లీ ఎన్నికల్లో కూడా సత్తా చాటాలని అనుకుంటూ ఉంది.