తెలుగుదేశం పార్టీ నాయకులకు కీలక సూచనలు చేసిన చంద్రబాబు

కొందరు సీనియర్ నేతల వారసులు రాజకీయాల్లోకి వచ్చారని, ఇంకొందరు ఉద్యోగాలు, వ్యాపారాలు చేసుకుంటున్నారన్నారు. యువకులనూ పార్టీలోకి ఆహ్వానిస్తున్నామని చంద్రబాబు అన్నారు. పార్టీలో పని చేసే యువ నేతలనూ గుర్తిస్తామని, అవకాశాలిస్తామని స్పష్టం చేశారు. ఒక్క సెకండులోనే 8,700 మంది సభ్యత్వం కోసం అప్రోచ్ అయ్యారని చంద్రబాబు అన్నారు. చంపేసినా ఫర్వాలేదు.. జై జగన్ అనే నినాదం చేయనంటూ చంద్రయ్య అనే కార్యకర్త చనిపోయారని, చంద్రయ్యలాంటి కార్యకర్తలే టీడీపీకి బలమని అన్నారు. నిజమైన కార్యకర్తలకు సరైన గౌరవం లభించడం లేదనే బాధ కొందరిలో ఉందని, ఆ బాధను తప్పించేలా చర్యలు తీసుకుంటున్నామన్నారు. ఏపీకి గత మూడేళ్లల్లో భారీ డామేజ్ జరిగిందని, రాష్ట్రాన్ని పునర్ నిర్మాణం చేయాల్సిన అవసరం ఉందని చంద్రబాబు అన్నారు.

ఫీల్డులో పని చేయకుండా మాయ చేసే నేతలకు ఇకపై చెక్ పెట్టనున్నట్లు చంద్రబాబు నాయుడు తెలిపారు. కొంత మంది నేతలు ఫీల్డులో పని చేయకుండా.. పార్టీ కార్యాలయం చుట్టూ తిరుగుతా ఉంటారన్నారు. ఏదో కార్యాలయం చుట్టూ తిరుగుతున్నారు కదా అని తాము కొన్నిసార్లు నమ్ముతామని.. ఇకపై అలాంటి నేతలకు కాలం చెల్లిందని చెప్పారు. ఎవరు పని చేశారు.. ఎవరు తప్పించుకుంటున్నారనేది మానిటర్ చేసే వ్యవస్థ వచ్చిందని చంద్రబాబు నాయుడు వెల్లడించారు.