TDP : టిక్కెట్ నాకే నంటూ పోస్టర్లు.. మండిపడుతున్న సీనియర్లు

అయితే కొన్ని చోట్ల తామే అభ్యర్థులమంటూ పోస్టర్లు వేసుకోవడం పార్టీలో చర్చకు దారి తీస్తుంది. ప్రొద్దుటూరులో ఇలాంటి ఘటన చోటు చేసుకుంది. ప్రొద్దుటూరు లో ఈ సారి సీటు కోసం అనేక మంది పోటీ పడుతున్నారు. ఈరోజు ఉదయం నిద్ర లేచే సరికి ప్రొద్దుటూరు మొత్తం ప్రవీణ్ కుమార్ రెడ్డి అభ్యర్థి అంటూ వాల్ పోస్టర్లు వెలిశాయి. వచ్చే ఎన్నికల్లో టీడీపీకి ఓటు వేయాలని, సైకిల్ గుర్తుకే మన ఓటు వేయాలని అంటూ పోస్టర్ చివరలో టీడీపీ అభ్యర్థి ప్రవీణ్ కుమార్ రెడ్డి అని ఉండటంతో చర్చనీయాంశమైంది. ఆయనకు టీడీపీ అధినేత టిక్కెట్ ఖరారు చేశారా? అన్న చర్చ పార్టీలో జరుగుతుంది. దీనిపై కొందరు పార్టీ నాయకత్వానికి కూడా ఫిర్యాదు చేశారు.

ప్రొద్దుటూరు టీడీపీ టిక్కెట్ కోసం ప్రవీణ్ కుమార్ రెడ్డితో పాటు మాజీ ఎమ్మెల్యేలు వరదరాజులు రెడ్డి, లింగారెడ్డిలు పోటీ పడుతున్నారు. వీరితో పాటు బీజేపీ రాజ్యసభ సభ్యుడు సీఎం రమేష్ సోదరుడు కూడా పోటీలో ఉన్నారు. వీరందరిని కాదని తనకే టిక్కెట్ ఇచ్చినట్లు, తానే అభ్యర్థిని అన్నట్లు ప్రకటించుకుంటూ పోస్టర్లు వేసుకోవడం ఏంటని అధినాయకత్వాన్ని ఈ నేతలు ప్రశ్నించినట్లు తెలిసింది. అయితే దీనిపై పార్టీ హైకమాండ్ నుంచి కూడా ప్రవీణ్ కుమార్ రెడ్డికి ఫోన్ చేయగా, తన అనుచరులు తొందరపడి వాల్ పోస్టర్లను ముద్రించారని, ఇందులో తనకు ఏ మాత్రం సంబంధం లేదని వివరణ ఇచ్చినట్లు తెలిసింది.