Armur : అడిగేవాడు లేడనే కదా...అడ్డగోలుగా సంపాదించింది.. తిన్నది మొత్తాన్ని...కక్కిస్తారా?

నిజామాబాద్ జిల్లా అంటే కేసీఆర్ కుమార్తె కల్వకుంట్ల కవిత అత్తగారి ప్రాంతం. నిజామాబాద్ అంటేనే కారు పార్టీకి కంచుకోట. అటువంటి జిల్లాలోని ఆర్మూరు నియోజకవర్గంలో జీవన్ రెడ్డి 2014, 2018 ఎన్నికల్లో వరసగా గెలిచారు. బీఆర్ఎస్ గొంతుగా నిలిచారు. అయితే తొమ్మిదిన్నరేళ్లు ఆయన చేసిన అవినీతి ఒక్కొక్కటి వెలుగు చూస్తుండటం ఇప్పుడు రాజకీయంగా హాట్ టాపిక్ గా మారింది. ఆర్టీసీకి చెందిన స్థలంలో మాల్ ను నిర్మించడంతో పాటు దానికి అద్దెలు కూడా చెల్లించలేదు. దాదాపు ఏడు కోట్ల రూపాయల లీజు మొత్తాన్ని ఎమ్మెల్యేగా వెలగబెడుతూ జీవన్ రెడ్డి ఎగ్గొట్టారు. అడిగేవాడు లేడని ఇష్టమొచ్చినట్లు వ్యవహరించారు.

తాజాగా స్టేట్ ఫైనాన్స్ కార్పొరేషన్ కూడా జీవన్ రెడ్డికి నోటీసులు ఇచ్చింది. మొత్తం 45 కోట్ల రూపాయలు జీవన్ రెడ్డి బకాయీ పడ్డారు. మాల్ నిర్మాణం కోసం స్టేట్ ఫైనాన్స్ కార్పొరేషన్ నుంచి ఇరవై కోట్లు అప్పు తీసుకున్నారు. ఇంతవరకూ పైసా చెల్లించలేదు. దానిపై వడ్డీ ఆరేళ్లుగా కట్టకపోతడంతో 25 కోట్ల రూపాయలు వడ్డీయే అయింది. 2017లో తీసుకున్న ఈ రుణం చెల్లించకపోవడంతో నలభై ఐదు కోట్ల రూపాయల బకాయి పేరుకుపోయింది. దీంతో స్టేట్ ఫైనాన్స్ కార్పొరేషన్ అధికారులు జీవన్ రెడ్డి ఇంటికి నోటీసులు అంటించారు. అప్పులు చెల్లించకపోతే ఆస్తులు సీజ్ చేస్తామని వార్నింగ్ కూడా ఇచ్చారు. అయితే ఇంత వరకూ దీనికి జీవన్ రెడ్డి నుంచి అధికారులకు ఎలాంటి సమాధానం రాకపోవడంతో మరి అధికారులు తదుపరి చర్యలకు సిద్ధమవుతున్నారన్న సమాచారం అందుతుంది.

ఇక అదే ఆర్మూరులో మున్సిపల్ ఛైర్‌పర్సన్ మీద అవిశ్వాసం పెట్టడానికి సొంత పార్టీ నేతలే రెడీ అయ్యారు.26 మంది బీఆర్ఎస్ మున్సిపల్ కౌన్సిలర్లు కలెక్టర్ ను కలిశారు. ఆర్మూర్ మున్సిపల్ ఛైర్‌పర్సన్ పండిత్ వినీతపై అవిశ్వాసం పెట్టేందుకు అనుమతివ్వాలని కోరారు. ఇది బీఆర్ఎస్ కు ఎదురు దెబ్బేనని చెప్పాలి. ఆర్మూరు మున్సిపాలిటీ కూడా కారు పార్టీ చేజారి పోతుందన్న అభిప్రాయం వ్యక్తమవుతుంది. మున్సిపల్ ఛైర్మన్ కు వ్యతిరేకంగా సమావేశమయ్యారు. మొత్తం మీద ఆర్మూరులో కారు పార్టీ ఇబ్బందులు ఎదుర్కొంటుంది. ఇది జీవన్ రెడ్డికి స్వయంకృతాపరాధమేనని చెప్పాలి. అందుకు మూల్యం కూడా ఆయనే చెల్లించుకోవాల్సి వస్తుంది.