AP BJP : ఇచ్చేది వారట.. తీసుకునేది అవతల వారట.. తాము తీసుకోబోమంటున్నారే

మరోవైపు టీడీపీ, జనసేన పొత్తు ఖరారయింది. రెండు పార్టీలూ పొత్తుతోనే ఈ ఎన్నికలకు వెళ్లాలని నిర్ణయించాయి. అయితే భారతీయ జనతా పార్టీ ఈ కూటమితో కలుస్తుందా? లేదా? అన్నది చర్చనీయాంశంగా మారింది. బీజేపీ ఈ కూటమితో కలవకపోతే ఒంటరిగా పోటీ చేస్తుంది. అప్పుడు టీడీపీ, జనసేన కూటమితో వామపక్షాలు కలుస్తాయి. బీజేపీ, టీడీపీ, జనసేన కూటమి కలసి పోటీ చేస్తే వామపక్షాలు విడిగా పోటీ చేస్తాయి. ఇది మాత్రం క్లారిటీ. అయితే బీజేపీ మాత్రం ఇప్పటి వరకూ ఎలాంటి నిర్ణయాన్ని ప్రకటించలేదు. తాము జనసేనతోనే ఏపీ ఎన్నికల్లో పోటీ చేస్తామని రాష్ట్ర పార్టీ నేతలు చెబుతూ వస్తున్నారు.

కేంద్ర పార్టీ నిర్ణయం ఎలా ఉంటుందన్నది ఇంకా తెలియరాలేదు. బహుశ వచ్చే నెలలో దీనిపై స్పష్టత వచ్చే అవకాశముంది. అయితే బీజేపీ నేతలు కొత్త వాదనను తెరపైకి తెచ్చారు. తాము భాగస్వామ్య పక్షాలుగా శాసించే స్థాయిలో ఉంటామని.. యాచించే స్థాయిలో ఉండమని చెబుతుంది. అంటే తెలంగాణ ఎన్నికల్లోనూ ఎన్డీఏ కూటమిలోని జనసేన పార్టీకి తాము ఎనిమిది సీట్లు కేటాయించామని చెబుతుంది. ఏపీలోనూ తమ కూటమిలో పార్టీలకు స్థానాలను కేటాయించే స్థితిలోనే ఉంటామని, ఒకరు ఇచ్చే స్థితిలో మాత్రం ఉండమని ఆ పార్టీ నేతలు చెబుతుండటంతో కొత్త సందేహాలకు తెర లేచింది. ఇది కేంద్ర నాయకత్వం నిర్ణయమా? రాష్ట్ర నేతల అభిప్రాయమా? అన్నది తెలియరాలేదు.

తెలంగాణలో పరిస్థితులు వేరు. ఏపీలో సీన్ వేరు. ఇక్కడ టీడీపీ, జనసేన కంటే బీజేపీ బలహీనంగా ఉంది. అందులో ఏమాత్రం సందేహం లేదు. అయితే ఇక్కడ టీడీపీకి, జనసేనకు స్థానాలు ఇచ్చే పరిస్థితి బీజేపీకి ఉండదన్నది అందిరికీ తెలిసిందే. ఇతర రాష్ట్రాలతో పోల్చుకుని ఏపీలోనూ తాము వ్యవహరిస్తామనుకోవడం మాత్రం అది భ్రమే అవుతుందంటున్నారు. మరి టీడీపీ, జనసేన కూటమిలో చేరుకుండా ఉండేందుకు బీజేపీ ఇలాంటి కొత్త మెలిక పెడుతుందా? అన్న సందేహాలు వ్యక్తమవుతున్నాయి. మొత్తం మీద ఏపీలో బీజేపీ స్ట్రాటజీ ఎలా ఉండబోతుంది? ఏ రకమైన వ్యూహాలు అనుసరిస్తుందన్న దానిపై ఇంకా క్లారిటీ రావాల్సి ఉంది.