YSRCP : నాలుగో లిస్ట్ కోసం కసరత్తులు... ఈరోజు నుంచి మళ్లీ పిలుపులు

ఈ నేపథ్యంలో నాలుగో లిస్ట్ లో ఎవరు ఉంటారన్న దానిపై పార్టీ నేతల్లో ఉత్కంఠ నెలకొంది. కడప పార్లమెంటు నుంచి వైఎస్ అవినాష్ రెడ్డిని కూడా పక్కకు తప్పించే అవకాశాలున్నాయని తెలిసింది. అలాగే రాజమండ్రి, అనకాపల్లి, విజయనగరం, మచిలీపట్నం, నరసాపురం, గుంటూరు, ఒంగోలు పార్లమెంటు నియోజకవర్గాల్లో ఈరోజు జరిపే చర్చలతో కొంత స్పష్టత వచ్చే అవకాశముంది. వైఎస్ వివేకా హత్య కేసులో అవినాష్ రెడ్డి పేరు బలంగా వినిపించడంతో ఆయనను తప్పించి ఆ స్థానంలో ఎవరికి అవకాశమివ్వాలన్న దానిపై కసరత్తు జరుగుతుంది. వైఎస్ కుటుంబానికే ఆ పదవి ఇస్తారా? లేదా మైనారిటీలను బరిలోకి దింపుతారా? అన్నది తేలాల్సి ఉంది.

అలాగే అనేక శాసనసభ నియోజకవర్గాల్లోనూ కొన్ని మార్పులు చేర్పులు చేసే అవకాశముంది. అయితే నాలుగో జాబితాలో మాత్రం స్వల్పంగానే మార్పులు ఉంటాయని చెబుతున్నప్పటికీ చివరి నిమిషంలో తాడేపల్లి క్యాంప్ కార్యాలయం నుంచి ఎవరికి పిలుపు వస్తుందా? అన్న టెన్షన్ నెలకొంది. గెలుపు గుర్రాలకే టిక్కెట్లు ఇచ్చేందుకు చేస్తున్న కసరత్తు ఒక కొలిక్కి వచ్చిందని చెబుతున్నారు. అయితే అదే సమయంలో ఐ ప్యాక్ టీం ఇచ్చిన నివేదికతో పాటు ఇంటలిజెన్స్ వర్గాలు ఇచ్చిన రిపోర్టులు కూడా ఈ మార్పులు చేర్పులు కీలకంగా మారనున్నాయి. సామాజికవర్గాల వారీగా బేరీజు వేసుకుని బీసీలకు అత్యధికంగా స్థానాలు ఇచ్చే దిశగా వైసీపీ ప్రయత్నాలు చేస్తుందని చెప్పాలి.