Look Back : 2024 లో తెలుగు రాష్ట్రాల్లో జరిగిన ఎన్నికలు ఏం చెబుతున్నాయ్?

స్కిల్ డెవలెప్ మెంట్ స్కామ్ కేసులో టీడీపీ అధినేత చంద్రబాబును 52 రోజుల పాటు జైల్లో ఉంచడంతో ఆయన పై సానుభూతి పెల్లుబికిందంటారు. చంద్రబాబు జైల్లో ఉన్నప్పుడే జనసేనఅధినేత పవన్ కల్యాణ్ అక్కడకు వెళ్లి కలసి వచ్చిజైలు బయటే పొత్తు ప్రకటన చేశారు. అప్పటి నుంచిపవన్ కల్యాణ్ మూడు పార్టీలు కలసి వెళ్లేందుకు ప్రయత్నించారు. చివరకు మూడు పార్టీలు కలసి పోటీ చేశాయి. 175 అసెంబ్లీ నియోజవర్గాలు, 25 పార్లమెంటు నియోజకవర్గాల్లో పోటీ చేస్తే కూటమి పార్టీలు మూడు కలసి 164 అసెంబ్లీ స్థానాల్లో విజయం సాధించాయి. 22 పార్లమెంటు స్థానాలను కైవసం చేసుకున్నాయి. అదే సమయంలో వైసీపీకి కేవలం పదకొండుశాసనసభ స్థానాలకు మాత్రమే పరిమితమయింది.

వైసీపీ ఈ స్థాయిలో ఓటమి పాలు కావడానికి జగన్ నిర్ణయాలే కారణమంటారు. కేవలం సంక్షేమం పైనే దృష్టి పెట్టడం, అభివృద్ధిని విస్మరించడంతో పాటు ఎన్నికల సమయంలో అభ్యర్థుల ఎంపికలో జరిగిన పొరపాట్లు కూడా కూటమి విజయానికి కారణాలుగా చెబుతారు. మరోవైపు చంద్రబాబు పై సానుభూతి, మోదీ, పవన్ కల్యాణ్ ల చరిష్మాఈసారి బాగా పనిచేసిందంటారు. కాంగ్రెస్, కమ్యునిస్టు పార్టీలు ఎప్పటిలాగానే శాసనసభలో కాలుమోపలేకపోయాయి. ఏపీకి రాజధాని అనేది లేకుండా చేయడం, మూడు రాజధానుల ప్రతిపాదన తేవడం వంటివి కూడా జగన్ పార్టీ ఓటమికి కారణాలుగా విశ్లేషణలు వెలువడ్డాయి. అయితే ఎన్నికలఫలితాల తర్వాత సహజంగానే ఎప్పటిలాగానే వైసీపీ ఈవీఎంలపై నెపం నెట్టేందుకు ప్రయత్నించింది. అయితే ఎన్నికల కమిషన్ ఈ వాదనను తోసిపుచ్చింది. ప్రజాభిప్రాయం మేరకే ఫలితాలు వస్తాయని తేల్చిచెప్పింది.

మరోవైపు తెలంగాణలో జరిగిన లోక్ సభ ఎన్నికల్లో 2023 వరకూ అధికారంలో ఉన్న బీఆర్ఎస్ పార్టీ భారీ ఎదురుదెబ్బ తగిలింది. తెలంగాణలో మొత్తం 17 పార్లమెంటు స్థానాలుండగా ఎనిమిది స్థానాల్లో కాంగ్రెస్ గెలిచింది. ఎనిమిది స్థానాల్లో భారతీయ జనతా పార్టీ గెలుపొందింది. అదే సమయంలో ఎంఐఎంకు ఒక్కస్థానమే లభించింది. బీఆర్ఎస్ ఒక్క స్థానంలోనూ గెలవలేదు. బీఆర్ఎస్ అధినేత కేసీఆర్ నియోజవర్గాల్లో ప్రచారం విస్తృతంగా నిర్వహించినా ఏ మాత్రం ఫలితం లేకుండా పోయింది. దీంతో బీఆర్ఎస్ అధినేత కేసీఆర్ అప్పటి నుంచి ఫాం హౌస్ కే పరిమితమయ్యారు. 2024లో జరిగిన లోక్ సభ ఎన్నికలు కారు పార్టీకి రాజకీయంగా ఇబ్బందులు కలిగించాయి.