Pawan Kalyan : బిల్డప్ తప్ప ఏమీ లేదా.. ఇదేనా అసలు సత్తా.. జగన్ ఓడించాలని.. తన పార్టీని తానే?

పవన్ కల్యాణ్ ప్యాకేజీ తీసుకున్నారంటే ఎవరూ నమ్మరు. ఎందుకంటే ఆయనకు సినిమాల్లో అంత క్రేజ్ ఉంది. డబ్బులకు కొదవ లేదు. ఇమేజ్ ఏ మాత్రం తగ్గని నటుడు. ఇప్పటికీ కోట్లాది మంది ఫ్యాన్ ఫాలోయింగ్ ఉన్న లీడర్ కమ్ హీరో. అయితే ఆయన తీసుకుంటున్న నిర్ణయాలు మాత్రం పార్టీ నేతలకు మింగుడు పడటం లేదు. జగన్ ను ఓడించాలన్న ఏకైక ధ్యేయంతో తన పార్టీని తానే దిగజార్చుకుంటున్నట్లు ఆయన వ్యవహార శైలి ఉందన్న కామెంట్స్ వినపడుతున్నాయి. నిజమే.. అందరూ ఒప్పుకోవాల్సిందే. జనసేనకు రెండు జిల్లాల్లో తప్ప పెద్దగా బలం లేదు. కానీ అవసరం అవతలి వారిదైనప్పుడు రాజకీయ పార్టీ అధినేతగా తాను ఎక్కడా తగ్గకూడదు.

అలా తగ్గితే పార్టీ శ్రేణుల్లోనూ, ముఖ్యంగా కాపు సామాజికవర్గంలోనూ తప్పుడు సంకేతాలు వెళతాయి. కానీ పవన్ కల్యాణ్ అదేమీ ఆలోచించడం లేదు. ప్రభుత్వ వ్యతిరేక ఓటు చీల్చకూడదన్న ఏకైక భావనతో ఆయన తీసుకుంటున్న నిర్ణయాలు పార్టీని పాతాళంలోకి నెట్టేసేలా కనపడుతున్నాయి. తొలుత మూడు పార్లమెంటు స్థానాలు, 24 అసెంబ్లీ స్థానాల్లో జనసేన పోటీ చేయనున్నట్లు పవన్ కల్యాణ్ ప్రకటించారు. ఈ అంకెలపైనే జనసేన నేతలు, కార్యకర్తలు పెదవి విరిచారు. ఇన్ని తక్కువ సీట్లు ఎందుకు తీసుకోవాల్సి వచ్చిందని నేరుగానే కొందరు ప్రశ్నించారు. మరికొందరు పార్టీకి రాజీనామా కూడా చేసేశారు. అన్నింటికీ ఒకే సమాధానం.. రాష్ట్ర అభివృద్ధి కోసమేనంటూ ఒకటే డైలాగ్.

రాష్ట్ర అభివృద్ధి కోసం అంటే.. పార్టీ పణంగా పెట్టడమేనా? అన్న ప్రశ్నకు మాత్రం పవన్ నుంచి సరైన సమాధానం మాత్రం అండడం లేదు. తాజాగా మరో మూడు సీట్లను తగ్గించుకున్నారు. నిన్న జరిగిన చర్చల్లో సీట్ల కేటాయింపుపై మూడు పార్టీలు ఒక అవగాహనకు వచ్చాయి. బీజేపీకి కేటాయించాల్సి రావడంతో తన సీట్లను పవన్ కల్యాణ్ త్యాగం చేశారట. టీడీపీ పదిహేడు లోక్‌సభ, 144 అసెంబ్లీ స్థానాల్లో పోటీ చేస్తుండగా, బీజేపీ పది అసెంబ్లీ, ఆరు లోక్‌సభ స్థానాల్లో పోటీ చేస్తుంది. జనసేన 21 అసెంబ్లీ, రెండు పార్లమెంటు స్థానాలకే పరిమితమయింది. దీంతో జనసైనికులు రగిలిపోతున్నారు. ఇదేం లెక్క.. ఇదేమి వ్యూహం అంటూ అధినేతపై సోషల్ మీడియాలో నేరుగానే విరుచుకుపడుతున్నారు. పవన్ కల్యాణ్ మాత్రం తాను సర్దుబాటు చేసుకున్నది జగన్ ఓడించడానికే నంటూ అదే మంత్రాన్ని జపిస్తున్నారు. మరి పవన్ ఈ నిర్ణయం పార్టీకి మేలు చేస్తుందా? లేక...?