అయ్యో పాపం.. ఆమె జీవితంలో ఇన్ని విషాదాలు ఏంటో!

కేరళ లోని వాయనాడ్ లో జులై నెలలో ప్రకృతి సృష్టించిన విధ్వంసం అంతా ఇంతా కాదు. కొండచరియలు విరిగిపడటంతో 24 ఏళ్ల శృతి తన మొత్తం కుటుంబాన్ని కోల్పోయింది. ఆ బాధను దిగమింగుకుని బ్రతుకుతున్న శృతి జీవితంలో మరో ఊహించని విషాదం నెలకొంది. ఆమె కాబోయే భర్త జెన్సన్ కారు ప్రమాదంలో గాయపడి ప్రాణాలు కోల్పోయాడు. అతను బుధవారం రాత్రి 8:50 గంటలకు మరణించాడని వైద్యులు ధృవీకరించారు. యాక్సిడెంట్ లో అతని ముక్కు నుండి అధిక రక్తస్రావం జరిగింది, అతని మెదడులో కూడా అంతర్గత రక్తస్రావం ఉన్నట్లు వైద్యులు గుర్తించారు. అతడి ప్రాణాలను కాపాడడానికి వైద్యులు చేసిన ప్రయత్నాలేవీ ఫలించలేదు. మంగళవారం నాడు జెన్‌సన్‌ కారును ఓ ప్రైవేట్‌ బస్సును ఢీకొనడంతో ఈ ప్రమాదం జరిగింది. వాహనంలో ఉన్న శృతి, జెన్సన్ కుటుంబ సభ్యులలో చాలా మందికి గాయాలయ్యాయి కానీ ప్రమాదం నుండి బయటపడ్డారు.