Tdp, Janasena : ఇద్దరం కలిసే వెళదాం... ఎవరేమనుకున్నా సరే.. గెలుపే ప్రధానంగా

ఉమ్మడి మ్యానిఫేస్టో రూపకల్పనకు సంబంధించి ఇప్పటికే కమిటీలు వేసుకున్న పార్టీలు ఆ యా కమిటీలు అందించిన నివేదిక ప్రకారం ఉమ్మడి మ్యానిఫేస్టో ను రూపొందించాలని నిర్ణయించారు. రెండు పార్టీలూ కలసి ఉన్నామని ప్రతి అడుగులో కనిపించేలా వ్యవహరింాచాలని ఇరు పార్టీల అగ్రనేతలు నిర్ణయించారు. ఓట్ల బదలాయింపు జరగాలంటే ఒకరి సమావేశంలో మరొకరు పొత్తులో ఉన్న పార్టీ క్యాడర్ లో జోష్ నింపేలా ప్రసంగాలు సాగడం మంచిదన్న అభిప్రాయం ఈ సమావేశంలో వ్యక్తమయనట్లు తెలిసింది. ముఖ్యమంత్రి పదవి విషయంలోనూ ఎలాంటి వ్యాఖ్యలు రెండు పార్టీల పరంగా చేయకపోవడమే మంచిదని నేతలిద్దరూ ఒక అంగీకారానికి వచ్చారు.

కూటమి అధికారంలోకి వచ్చిన తర్వాత చంద్రబాబు, పవన్ కల్యాణ్‌లు కూర్చుని ముఖ్యమంత్రి పదవిలో ఎవరు ఉండాలన్నది నిర్ణయిస్తారన్న దానినే ఎక్కువగా హైలెట్ చేయాలని అనుకున్నారు. అంతే తప్ప మరొకరు ఎవరూ ముఖ్యమంత్రి పదవిపై మాట్లాడకుండా, నోరు జారకుండా పార్టీ కింది స్థాయి నేతలకు ఆదేశాలు జారీ చేయాలన్న నిర్ణయానికి కూడా వచ్చారు. ఇక సీట్ల పంపిణీపై కూడా ఒక అవగాహనకు వచ్చినట్లు తెలిసింది. జనసేనకు బలమున్న ప్రాంతాల్లో ఖచ్చితంగా ఆ సీటును జనసేనకే ఇచ్చేందుకు చంద్రబాబు అంగీకరించారని తెలిసింది. అయితే జిల్లాల్లో అన్నీ కాకుండా ప్రతి జిల్లాల్లో రెండు పార్టీలకు భాగస్వామ్యం ఉండేలా చర్యలు తీసుకోవాలని కూడా భావించినట్లు తెలిసింది.

మరోవైపు జనసేన అధినేత పవవన్ కల్యాణ్ తన పార్టీకి నలభై స్థానాలను కేటాయించాలన్న ప్రచారం పై కూడా చర్చకు వచ్చినట్లు తెలిసింది. అయితే అంకెలు ముఖ్యం కాదని, గెలుపు ప్రధానమని చంద్రబాబు అభిప్రాయపడినట్లు సమాచారం. అందుకు పవన్ కల్యాణ్ కూడా అంగీకరించారని చెబుతున్నారు. బీజేపీని కలుపుకుని పోవడమే బెటర్ అన్న అభిప్రాయానికి ఇరు పార్టీల నేతలు వచ్చారు. బీజేపీ నిర్ణయం కోసం మరికొంత కాలం వెయిట్ చేద్దామని కూడా పవన్, చంద్రబాబులు ఈ సమావేశంలో నిర్ణయించారు. మరొక సారి ఢిల్లీ వెళ్లి బీజేపీ నేతలతో చర్చించిరావాలని పవన్ ను చంద్రబాబు కోరినట్లు తెలిసింది. మొత్తం మీద ఇరు పార్టీల నేతల భేటీ సాఫీగా... ఎలాంటి బేధాభిప్రాయాలు లేకుండా సాగినట్లు పార్టీ వర్గాలు వెల్లడించాయి.