హార్దిక్ పాండ్యా కెరీర్ గురించి సంచలన వ్యాఖ్యలు చేసిన రవి శాస్త్రి
హార్దిక్ 2016లో తన ODI అరంగేట్రం చేసాడు. ఇప్పటివరకు అతను కేవలం రెండు యాభై ఓవర్ల ICC ఈవెంట్‌లను మాత్రమే ఆడాడు
ఇంగ్లండ్ ఆల్ రౌండర్ బెన్ స్టోక్స్ ఇటీవల వన్డే క్రికెట్ నుండి రిటైర్మెంట్ ప్రకటించాడు. దీంతో ప్రపంచ వ్యాప్తంగా వన్డే క్రికెట్ భవిష్యత్తు గురించి చర్చ జరుగుతూ ఉంది. ఇలాంటి తరుణంలో టీమిండియా కీలక ఆటగాడు, ఆల్ రౌండర్ హార్ధిక్ పాండ్యాను ఉద్దేశించి మాజీ హెడ్ కోచ్ రవిశాస్త్రి కీలక వ్యాఖ్యలు చేశారు. వచ్చే ఏడాది ఇండియాలో జరగనున్న వన్డే ప్రపంచ కప్ తర్వాత వన్డేల నుంచి హార్ధిక్ పాండ్యా తప్పుకునే అవకాశం ఉందని అన్నారు. హార్దిక్ వన్డేలను వదిలేసి, టీ20లకే పరిమితమయ్యే అవకాశం ఉందని అన్నారు. భవిష్యత్తులో చాలా మంది ఆటగాళ్లు టీ20 ఫార్మాట్ కే ప్రాధాన్యతను ఇస్తారని.. వన్డేలు, టీ20ల కంటే టెస్ట్ క్రికెట్ చాలా ప్రత్యేకమైనదైనప్పటికీ... టెస్ట్ క్రికెట్ రోజురోజుకు ఆదరణ కోల్పోతోందని అన్నారు. ఆటగాళ్లు ఏయే ఫార్మాట్లలో ఆడాలో వారే నిర్ణయించుకుంటున్నారని.. హార్ధిక్ విషయానికి వస్తే టీ20 ఆడాలనుకుంటున్నాడని రవి శాస్త్రి అన్నారు.
