పాక్ ను ఘోరంగా ఓడించిన టీమిండియా

దక్షిణాసియా ఫుట్ బాల్ ఫెడరేషన్ చాంపియన్ షిప్ లో భారత జట్టు పాక్ ను ఘోరంగా ఓడించింది. బెంగళూరు వేదికగా జరిగిన గ్రూప్ ‘ఎ’పోరులో చిరకాల ప్రత్యర్థి పాకిస్థాన్ పై భారత్ అద్భుత విజయాన్ని అందుకుంది. నిర్ణీత 90 నిమిషాల ఆటలో భారత్ 4-0 గోల్స్ తేడాతో పాకిస్థాన్ పై ఘనవిజయాన్ని అందుకుంది. భారత కెప్టెన్ సునీల్ ఛెత్రి హ్యాట్రిక్ గోల్స్ తో చెలరేగాడు. సునీల్ ఛెత్రి (10వ నిమిషంలో, 16వ నిమిషంలో, 74వ నిమిషంలో) మూడు గోల్స్ చేశాడు. ఉదాంత కుమమ్ మరో గోల్ ను 84వ నిమిషంలో చేశాడు. ఆట ఆరంభం నుంచే భారత్ స్పష్టమైన ఆధిపత్యాన్ని ప్రదర్శించింది. ఆట 10వ నిమిషంలో పాకిస్తాన్ గోల్ కీపర్ తప్పిదం కారణంగా.. బంతిని అందుకున్న ఛెత్రి గోల్ చేసి భారత్ కు తొలి గోల్ ను అందించాడు. మరో 6 నిమిషాల అనంతరం భారత్ కు పెనాల్టీ లభించింది. దీనిని గోల్ గా మలచిన ఛెత్రి భారత్ కు ఫస్ట్ హాఫ్ లో 2-0 ఆధిక్యాన్ని ఇచ్చాడు.