బుమ్రా బౌలింగ్ లో.. అయ్యో రోహిత్ శర్మ

బుమ్రా-రోహిత్ శర్మ.. ఈ ఇద్దరూ ఒకే జట్టులోని సాగుతూ ఉన్నారు. ఐపీఎల్ లో కూడా వీరు ముంబైకి కలిసి ఆడుతున్నారు. నెట్స్ లో మాత్రమే బుమ్రా బౌలింగ్ ను ఎదుర్కొనే రోహిత్ శర్మ.. ఈ మ్యాచ్ లో కాస్త ఇబ్బంది పడ్డాడు. బుమ్రా వేసిన బంతులకు రోహిత్ శర్మ ఇబ్బంది పడుతూ కనిపించాడు. ఏడో ఓవర్లో బుమ్రా వేసిన ఓ బంతి రోహిత్‌కు గజ్జల్లో బలంగా తగిలింది. నొప్పికి తట్టుకోలేక భారత కెప్టెన్‌ కాసేపు మోకాళ్లపై కూర్చుండిపోయాడు. జట్టు ఫిజియో వచ్చి అతడిని పరీక్షించాడు. ఆ తర్వాత రోహిత్‌ బ్యాటింగ్‌ కొనసాగించడంతో అందరూ ఊపిరిపీల్చుకున్నారు. ఇక టాపార్డర్ పెద్దగా ఆకట్టుకోవడంలో విఫలమైంది.

కోన శ్రీకర్‌ భరత్‌ (111 బంతుల్లో 70 బ్యాటింగ్‌; 8 ఫోర్లు, 1 సిక్స్‌) మంచి ఇన్నింగ్స్ ఆడాడు. రోజంతా నిలబడి అజేయంగా నిలిచాడు. దీంతో గురువారం తొలిరోజు ఆట ముగిసే సమయానికి భారత్‌ తొలి ఇన్నింగ్స్‌లో 60.2 ఓవర్లలో 8 వికెట్ల నష్టానికి 246 పరుగులు చేసింది. కెప్టెన్‌ రోహిత్‌ శర్మ (25; 3 ఫోర్లు), శుబ్‌మన్‌ గిల్‌ (21; 4 ఫోర్లు), హనుమ విహారి (3), శ్రేయస్‌ అయ్యర్‌ (0) నిరాశ పరిచారు. విరాట్‌ కోహ్లి (69 బంతుల్లో 33; 4 ఫోర్లు, 1 సిక్స్‌) పర్వాలేదనిపించాడు. రవీంద్ర జడేజా (13) కూడా విఫలమవడంతో 81 పరుగులకే భారత్‌ 5 ప్రధాన వికెట్లను కోల్పోయింది. కోహ్లితో జతకట్టిన శ్రీకర్‌ ఇన్నింగ్స్‌ను కుదుట పరిచాడు. ఆరో వికెట్‌కు 57 పరుగులు జోడించాక కోహ్లి నిష్క్రమించాడు. శార్దుల్‌ ఠాకూర్‌ (6) పెవిలియన్ చేరగా.. టెయిలెండర్లలో ఉమేశ్‌ యాదవ్‌ (23; 4 ఫోర్లు), షమీ (18 బ్యాటింగ్‌; 2 ఫోర్లు, 1 సిక్స్‌) సహాకారం ఇవ్వడంతో భరత్‌ అర్ధ సెంచరీ పూర్తి చేసుకున్నాడు. లీస్టర్‌షైర్‌ బౌలర్లలో రోమన్‌ వాకర్‌ 5 వికెట్లు పడగొట్టగా, విల్‌ డేవిస్‌కు 2 వికెట్లు దక్కాయి. భారత ఆటగాళ్లలో అందరికీ ప్రాక్టీస్‌ కల్పించాలన్న ఉద్దేశంతో నలుగురు ప్రధాన ఆటగాళ్లు బుమ్రా, రిషభ్‌ పంత్, చతేశ్వర్‌ పుజారా, ప్రసిధ్‌ కృష్ణలను లీస్టర్‌షైర్‌ తరఫున ఆడించారు. వర్షం పదేపదే అంతరాయం కలిగించడంతో తొలిరోజు 60.2 ఓవర్ల ఆటే సాధ్యమైంది.