ప్రపంచ కప్ లో బుమ్రా స్థానంలో ఆడబోతున్న మరో స్టార్.. అంచనాలు అందుకునేనా..?

అక్టోబర్ 16న ఆస్ట్రేలియాలో ప్రారంభం కానున్న T20 వరల్డ్ కప్ 2022 కోసం భారత జట్టును ఇప్పటికే ప్రకటించింది. 15 మంది సభ్యులతో కూడిన భారత జట్టులో గాయపడిన జస్ప్రీత్ బుమ్రా స్థానంలో మహమ్మద్ షమీ ఎంపికయ్యాడు. ప్రారంభంలో T20 ప్రపంచ కప్ జట్టు కోసం స్టాండ్‌బై జాబితాలో షమీ పేరు ఉండగా.. ఇప్పుడు బుమ్రా టోర్నమెంట్ నుండి బయటకు వెళ్లిపోవడంతో అనుభవజ్ఞుడైన పేసర్‌కు అవకాశంగా మారింది. మహ్మద్ సిరాజ్, శార్దూల్ ఠాకూర్‌లు బ్యాకప్‌ ఆటగాళ్లుగా బీసీసీఐ ప్రకటించింది. వారిద్దరూ త్వరలో ఆస్ట్రేలియాకు వెళ్లనున్నారు. అక్టోబర్ 23న చిరకాల ప్రత్యర్థి పాకిస్థాన్‌తో జరిగే మ్యాచ్‌తో భారత్ టీ20 ప్రపంచకప్ ను ప్రారంభించనుంది. "ఐసీసీ పురుషుల టి20 ప్రపంచకప్ జట్టులో జస్ప్రీత్ బుమ్రా స్థానంలో మహ్మద్ షమీని ఆల్-ఇండియా సీనియర్ సెలక్షన్ కమిటీ ఎంపిక చేసింది. షమీ ఆస్ట్రేలియా చేరుకున్నాడు. వార్మప్ మ్యాచ్‌లకు ముందు బ్రిస్బేన్‌లోని జట్టుతో జతకట్టనున్నాడు" అని బీసీసీఐ శుక్రవారం ఒక ప్రకటనలో తెలిపింది.