ఇదెక్కడి షాక్.. ఉప్పల్ కు నో ఎంట్రీ అట

భారత్ వేదికగా ఈ ఏడాది వన్డే ప్రపంచ కప్‌ జరగనుంది. అయితే భారత్ ఆడే మ్యాచుల్లో ఒక్కటి కూడా హైదరాబాద్‌కు కేటాయించలేదు. ఇక ఉప్పల్‌ స్టేడియంలో సెప్టెంబర్ 29న పాకిస్థాన్-న్యూజిలాండ్ మధ్య వార్మప్ మ్యాచ్‌ జరగనుండగా.. ఆ మ్యాచ్ ను అయినా వీక్షిద్దామని అభిమానులు ఆశిస్తూ ఉండగా.. ఆ మ్యాచ్ ను వీక్షించడానికి ప్రేక్షకులను అనుమతించడం లేదని తెలిపారు. ఈ మ్యాచ్ ఖాళీ స్టేడియంలో జరగనుంది. ఈ నెల 28న గణేష్ నిమజ్జనం, మిలాద్ -ఉన్ -నబీ పండగ ఉండటంతో ఈ మ్యాచ్‌కు భద్రత కల్పించలేమని హైదరాబాద్ నగర పోలీసులు హైదరాబాద్ క్రికెట్ అసోసియేషన్ కు స్పష్టం చేశారు. బీసీసీఐ సూచన మేరకు హెచ్‌సీఏ మ్యాచ్‌ను ప్రేక్షకులు లేకుండా ఖాళీ స్టేడియంలో నిర్వహించనుంది. ఈ మ్యాచ్‌ కోసం ఇప్పటికే టికెట్లు కొనుగోలు చేసిన వారికి డబ్బులు తిరిగి చెల్లించనున్నారు. ఇక అక్టోబర్ 3న ఆస్ట్రేలియా–పాక్‌ వార్మప్‌తో పాటు మూడు వరల్డ్‌ కప్‌ మ్యాచ్‌లు అభిమానుల సమక్షంలో నిర్వహించనున్నారు.