T20 WorldCup: టీ20 ప్రపంచ కప్ లో భారత జట్టుకు ఊహించని షాక్

టాస్ గెలిచిన కివీస్ 20 ఓవర్లలో కేవలం 4 వికెట్లు నష్టపోయి 160 పరుగులు చేసింది. కివీస్ ఓపెనర్లు శుభారంభాన్ని ఇచ్చారు. బేట్స్ 27 పరుగులు.. ప్లిమ్మర్ 34 పరుగులతో రాణించారు. అయితే ఆ తర్వాత వచ్చిన కెప్టెన్ సోఫీ డివైన్ హాఫ్ సెంచరీతో స్కోరు బోర్డును పరుగులు పెట్టించింది. 36 బంతుల్లో 57 పరుగులు చేసి నాటౌట్ గా నిలిచింది సోఫీ. భారత బౌలర్లలో రేణుక సింగ్ రెండు వికెట్లు తీయగా, అరుంధతి రెడ్డి, ఆశా శోభన చెరొక వికెట్ తీశారు.

ఇక ఛేజింగ్ లో భారత ఓపెనర్లు శుభారంభాన్ని అందించలేకపోయారు. షిఫాలీ రెండో ఓవర్లోనే పెవిలియన్ బాట పట్టింది. ఆ తర్వాత 28 పరుగుల వద్ద 12 పరుగులు చేసిన స్మృతి మందాన నిష్క్రమించింది. కెప్టెన్ హర్మన్ ప్రీత్ 15 పరుగులతో టాప్ స్కోరర్ గా నిలిచిందంటే భారత బ్యాటర్లు ఎలాంటి ప్రదర్శన ఇచ్చారో ప్రత్యేకంగా చెప్పాల్సిన అవసరం లేదు. 19 ఓవర్లలో భారత జట్టు 102 పరుగులకు ఆలౌట్ అయింది. రోస్ మేరీ 4 వికెట్లు తీసి భారత జట్టు పతనాన్ని శాసించింది.