KCR : వచ్చే ఎన్నికల్లో కాంగ్రెస్ కు వచ్చేది 20 సీట్లే.. చెప్పేసిన కేసీఆర్

గత పదేళ్లలో ఎక్కడా కరెంట్ కట్ లేదు. 24 గంటలు నీళ్లు వస్తున్నాయన్నారు. పొలాలన్నీ పచ్చగా మారాయని తెలిపారు. అతి తక్కువ కాలంలో తెలంగాణ సాధించిన విజయాలు అనేకం ఉన్నాయి. తెలంగాణ తలసరి ఆదాయం 2014 లో పద్దెనిమిదిలో ఉంటే.. ఈరోజు దేశంలోనే నెంబర్ వన్ అని తెలిపారు. ధాన్యం ఉత్పత్తిలో పంజాబ్ ను తలదన్ని వరిని పండిస్తున్నామని తెలిపారు. ఏపీలో ఎట్లుంది? తెలంగాణలో వరి పంట ఎట్లుందో చూసుకోవాలన్నారు. దేశానికే అన్నపూర్ణగా తెలంగాణను తయారు చేశామన్నారు.

ప్రతి ఇంటికి శుద్ధిగల మంచినీటిని అందిస్తున్నామని, నల్లా రూపాయికే అందించామని కేసీఆర్ చెప్పారు. దళితుల్లో పేదరికం పోవాలనే దళిత బంధు పథకాన్ని తెచ్చామని తెలిపారు. మద్యం, ఫెర్టిలైజర్ షాపుల్లో దళితులకు రిజర్వేషన్లు కల్పించామని తెలిపారు. పట్టి లేని భట్టి విక్రమార్కకు ఓటేస్తే మనకు ఒరిగేదేంటి? అని కేసీఆర్ ప్రశ్నించారు. కాంగ్రెస్ లో డజను మంది ముఖ్యమంత్రులున్నారని, కాంగ్రెస్ కు ఇరవై లోపే సీట్లు వస్తాయని కేసీఆర్ అన్నారు. కాంగ్రెస్ అధికారంలోకి వచ్చేది లేదు.. సచ్చేది లేదని అన్నారు. దానికి ఓటేసి మోసపోవద్దని అన్నారు. బీఆర్ఎస్ ను గెలిపిస్తే దళితబంధు మధిరలోని అన్ని మండలాలకు ఇస్తామని తెలిపారు. కమలరాజ్ ను గెలిపిస్తే ఇంకా మధిర అభివృద్ధి జరుగుతుందన్నారు.