స్పీడు పెంచిన కమలం.. ఆ రోజే తొలి జాబితా!

తెలంగాణలో ఎన్నికల జోష్‌ పెరిగిపోయింది. వివిధ పార్టీల నేతలు సరికొత్త వ్యూహాలతో ముందుకు సాగుతున్నారు. రాష్ట్రంలో అగ్రనేతల పర్యటనలు, బహిరంగ సభలు, నేతల ప్రచారాలతో పార్టీలో జోష్‌ ఉండేలా ప్లాన్‌లు చేస్తున్నారు. నేతల భేటీలు పార్టీ కార్యకర్తల్లో జోష్‌ నింపుతున్నారు. ఎన్నికల షెడ్యూల్ విడుదల కాగానే బీజేపీ స్పీడ్‌ పెంచింది. అభ్యర్థుల తొలి జాబితాను విడుదల చేసేందుకు రంగం సిద్ధం చేస్తోంది. ఇప్పటికే మొదటి జాబితాపై కసరత్తు పూర్తి అయిందని.. త్వరలోనే పార్టీ అధిష్టానం విడుదల చేస్తుందని కాషాయం నేతలు చెబుతున్నారు. ఈ క్రమంలో పార్టీలో చేరికలపై కూడా ఫోకస్‌ పెట్టాలని కేంద్ర హోం మంత్రి అమిత్‌ షా.. టీ బీజేపీ నేతలకు సూచించడంతో కీలక నేతలంతా ఈ విషయంపై ప్రత్యేక దృష్టి పెడుతున్నారు. ఇతర పార్టీల్లో పేరున్న నేతలకు గాలం వేస్తున్నారు. ఆదిలాబాద్, సికింద్రాబాద్ లో జరిగిన పార్టీ కార్యక్రమాల్లో పాల్గొన్న కేంద్ర హోమంత్రి, బీజేపీ అగ్రనేత అమిత్ షా.. మొన్న గంటపాటు ముఖ్య నేతలతో భేటీ అయ్యారు. ఈ సమయంలో చేరికలు, మేనిఫెస్టోపై దృష్టి పెట్టాలని సూచించారు. దీంతోపాటు తెలంగాణలో వరుస సభలకు ప్లాన్‌ సిద్ధం చేయాలని సూచించినట్లు తెలుస్తోంది.