అమీర్‌పేటలో వైన్ షాప్ టెండర్ సొంతం చేసుకున్న ఏపీ సర్పంచ్
తెలంగాణ రాష్ట్రంలోని మద్యం షాపులకు సోమవారం లక్కీ డ్రాలు నిర్వహించారు.
తెలంగాణ రాష్ట్రంలోని మద్యం షాపులకు సోమవారం లక్కీ డ్రాలు నిర్వహించారు. కలెక్టర్లు, ఎక్సైజ్‌ డిప్యూటీ కమిషనర్ల పర్యవేక్షణలో రాష్ట్రంలోని 2,620 వైన్ షాపులకు లక్కీ డ్రా తీశారు. ఏకంగా 1,31,490 దరఖాస్తులు వచ్చాయి. ఈసారి 40 శాతం మంది కొత్త వారికి షాపులు దక్కాయి. ఏపీలో ప్రభుత్వమే మద్యం షాపులను నిర్వహిస్తుండటంతో తెలంగాణలోని పలు ప్రాంతాల షాపులకు ఏపీ వ్యాపారులు కూడా దరఖాస్తు చేశారు. ఖమ్మం, కొత్తగూడెం, నల్లగొండ, సూర్యాపేట, హుజూర్‌నగర్‌, షాద్‌నగర్‌, మహబూబ్‌నగర్‌ తదితర ప్రాంతాల్లో ఎక్కువగా ఏపీ కి చెందిన వారు దరఖాస్తు చేసుకున్నారు. ఏపీలోని కోనసీమ జిల్లా అల్లవరం మండలం మొగళ్లమూరు సర్పంచ్‌కు హైదరాబాద్‌లో వైన్ షాపు దక్కడం విశేషం. సర్పంచ్ రాయుడు విష్ణుత్రిమూర్తులు తన భార్య పేరిట రెండు టెండర్లు వేశారు. లక్కీ డ్రాలో అమీర్‌పేటలోని ఓ షాపు దక్కించుకున్నారు. ఇంకా పలువురు ఏపీకి చెందిన వ్యక్తులు వైన్ షాప్ టెండర్లు సొంతం చేసుకున్నారు.
