Telangana : వారం రోజుల్లో మీ చేతుల్లో రేషన్ కార్డులు... మీరు అర్హులేనా? తెలుసుకోవాలని ఉందా?

తెల్ల రంగు రేషన్ కార్డుకు యమా డిమాండ్ ఉంది. రెండు వందల యూనిట్ల వరకూ ఉచిత విద్యుత్తు, ఐదు వందల రూపాయలకే గ్యాస్ సిలిండర్ కూడా ఈ కార్డుతోనే లభించనున్నాయి. అయితే ఇందుకోసం ఇప్పటికే సర్వే ప్రారంభించారు. రేషన్ కార్డులు లేని అర్హులైన వారందరికీ ఇవ్వాలని ప్రభుత్వం నిర్ణయించింది. కొత్త రేషన్ కార్డులను ఈ నెల 26వ తేదీ నుంచి జారీ చేయడం ప్రారంభిస్తారు. ఈ నెల 20వ తేదీ నుంచి 24వ తేదీ వరకూ అభ్యంతరాలు స్వీకరించి గ్రామసభలద్వారా లబ్దిదారులను నిర్ణయించే ప్రక్రియను చేపట్టారు. గ్రామ సభల్లో వచ్చే అభ్యంతరాలను పరిశీలించిన తర్వాత మాత్రమే తుది జాబితాను సిద్ధం చేయనున్నామని పౌర సరఫరాల శాఖ అధికారులు తెలిపారు.

ఇప్పటి వరకూ అందిన సమాచారం మేరకు తెలంగాణలో 6.68 లక్షల మందికి కొత్తగా రేషన్ కార్డులు మంజూరు చేయాలని ప్రాధమికంగా అధికారులు నిర్ణయించినట్లు తెలిసింది. గత ఏడాది నిర్వహించిన సమగ్ర కుటుంబ సర్వే ఆధారంగా కార్డులను జారీ చేసే ప్రక్రియ ప్రారంభిస్తామని తెలిపారు. హైదరాబాద్ లోనే అత్యధికంగా తెలుపు రంగు రేషన్ కార్డుల కోసం దరఖాస్తు చేసుకున్నారు. గ్రేటర్ హైదరాబాద్ మున్సిపల్ కార్పొరేషన్ కు సంబంధించి ఇప్పటికే రేషన్ కార్డుల లబ్దిదారులను గుర్తించినట్లు తెలిసింది. దాదాపు 90 వేల మంది హైదరాబాద్ నగరంలోని వారికే రేషన్ కార్డులు మంజూరు చేసే అవకాశముందని అధికారులు చెబుతున్నారు. మొత్తం మీద మరో వారం రోజుల్లో రేషన్ కార్డు మీ చేతుల్లో ఉంటుందని ప్రభుత్వ వర్గాలు భరోసా ఇస్తున్నాయి.