చంద్రబాబు ఢిల్లీ టూర్ పై బండి సంజయ్ కామెంట్లు
అమిత్ షా నివాసంలో 50 నిముషాల పాటు అమిత్ షా, జేపీ నడ్డాతో చంద్రబాబు సమావేశం కొనసాగింది.
కేంద్ర మంత్రి అమిత్ షా, బీజేపీ జాతీయాధ్యక్షుడు జేపీ నడ్డాతో టీడీపీ అధినేత చంద్రబాబు నాయుడు సమావేశమవ్వడంపై బీజేపీ తెలంగాణ అధ్యక్షుడు బండి సంజయ్ స్పందించారు. టీడీపీ-బీజేపీ పొత్తు ఊహగానాలేనని.. బీజేపీ అగ్రనేతలను చంద్రబాబు కలిస్తే తప్పేంటి? అని అన్నారు. బీజేపీ జిల్లా నేతల టెలికాన్ఫరెన్స్ లో బండి సంజయ్ ఈ వ్యాఖ్యలు చేశారు. ప్రధాని మోదీ, కేంద్ర మంత్రి అమిత్ షాను గతంలో పశ్చిమ బెంగాల్ ముఖ్యమంత్రి మమతా బెనర్జీ, తమిళనాడు ముఖ్యమంత్రి స్టాలిన్, బిహార్ ముఖ్యమంత్రి నితీశ్ కుమార్ వంటి వారూ కలిశారని అన్నారు. ప్రతిపక్షాలను, ప్రజలను కలవకుండా కేసీఆర్ మాత్రమే ఉంటారని, ఆయనలా రాష్ట్ర ప్రయోజనాలను తాకట్టు పెట్టే పార్టీ తమది కాదని అన్నారు. బీజేపీ నేతలను చంద్రబాబు కలవడంతో ఊహాజనిత కథనాలు వస్తున్నాయని, వాటిని పట్టించుకోవాల్సిన అవసరం లేదని అన్నారు. తెలంగాణలో బీజేపీ బలం పెరుగుతోందని.. బీజేపీని దెబ్బతీసేందుకు బీఆర్ఎస్, కాంగ్రెస్, మరికొన్ని శక్తులు ప్రయత్నిస్తున్నాయని అన్నారు.
