వర్షాలు తగ్గుతాయట

భారీ వర్షాలు ఉత్తర తెలంగాణ జిల్లాలను అతలాకుతలం చేశాయి. భూపాలపల్లి, ములుగు, హనుమకొండ, వరంగల్, మహబూబాబాద్, జనగామ, కొత్తగూడెం జిల్లాలలో వాగులు, వంకలు పొంగిపొర్లాయి. పెద్దసంఖ్యలో చెరువులు, రోడ్లు తెగిపోయి, వందలాది గ్రామాలతోపాటు పట్టణాల్లోని కాలనీలు జలదిగ్బంధంలో చిక్కుకున్నాయి. ఆదిలాబాద్​, ఆసిఫాబాద్​, మంచిర్యాల, నిర్మల్​, నిజామాబాద్​, సిరిసిల్ల, పెద్దపల్లి, సిద్దిపేట, సూర్యాపేట, వనపర్తి, కరీంనగర్​ జిల్లాల్లోనూ అతి భారీ వర్షం కురిసింది. గ్రేటర్​ వరంగల్​లో పలు కాలనీలు నీటమునిగాయి. అధికారులు ప్రజలను రిలీఫ్​ క్యాంపులకు తరలించారు. కాజీపేట రైల్వే స్టేషన్​లోకి నీళ్లు చేరడంతో పలు రైళ్లను రద్దు చేశారు. వరంగల్ హంటర్ రోడ్ ఖమ్మం బ్రిడ్జి జంక్షన్‌లోని జ్యోతిబా పూలే బాలికల రెసిడెన్షియల్ హాస్టల్‌లో రెండ్రోజులుగా చిక్కుకుని ఉన్న 280 మంది విద్యార్థులను ఎన్డీఆర్ఎఫ్ టీమ్​లు రక్షించాయి.