ఇరాక్ లో తెలంగాణ వాసుల కష్టాలు.. నాలుగు నెలలుగా జీతం లేదు

జగిత్యాల జిల్లా ధర్మపురి మండలం కొరండ్లపల్లి కి చెందిన పంగ సత్తయ్య, బుగ్గారం మండలం సిరికొండ కు చెందిన బట్టు హరీష్, నిజామాబాద్ జిల్లా నందిపేట మండలం తల్వేద కు చెందిన ఒరికె నడిపి రాజన్న గత రెండేండ్లుగా ఇరాక్ లోని బస్రా పట్టణంలో ఒక నిర్మాణ కంపెనీలో కూలీలుగా పనిచేస్తున్నారు. వీరి కుటుంబ సభ్యులు ప్రజావాణి ప్రత్యేక అధికారి దివ్యా దేవరాజన్ ను కలిసి తమ సమస్య గురించి చెప్పుకున్నారు. నాలుగు నెలల జీతం బకాయిలు, ఉద్యోగ అనంతర ప్రయోజనాలు ఇప్పించి ముగ్గురిని ఇరాక్ నుంచి భారత్ కు తీసుకుని రావాలని విజ్ఞప్తి చేశారు. తెలంగాణ ప్రభుత్వ జిఏడి ఎన్నారై అధికారి ఎస్. వెంకట రావు తో దివ్యా దేవరాజన్ వెంటనే ఫోన్ లో మాట్లాడారు. ఇరాక్ లోని ఇండియన్ ఎంబసీ దృష్టికి ఈ సమస్యను తీసికెళ్లాలని కోరారు. బాధితుల వెంట టీపీసీసీ ఎన్నారై సెల్ కన్వీనర్ మంద భీంరెడ్డి, ఇండియన్ ఓవర్సీస్ కాంగ్రేస్ యూకే ఉపాధ్యక్షులు రంగుల సుధాకర్ గౌడ్, ఎమిగ్రంట్స్ వెల్ఫేర్ ఫోరం ప్రతినిధి మహ్మద్ బషీర్ అహ్మద్ లు ఉన్నారు.