పాపం.. పవన్.. ఎందుకో ఇలా...?

అయితే పవన్ కల్యాణ్ విషయంలో అదేంటో గాని అంతా విమర్శలకు తగ్గినట్లుగానే ఆయన కార్యక్రమాలు కూడా ఉంటున్నాయి. అదే ఆయనకు మరింత ఇబ్బందిగా మారింది. గాలి విమర్శలా..? గట్టి ఆరోపణలా? అన్నది భవిష‌్యత్ తేల్చనుంది. పవన్ కల్యాణ్ కు ఒకరి నుంచి ప్యాకేజీ తీసుకోవాల్సిన అవసరం ఎంత మాత్రం ఉండదు. అది అందరికీ తెలిసిందే. ఆయన ఒక్క సినిమాకు కోట్ల రూపాయల రెమ్యునరేషన్ తీసుకుంటారు. ఆయన ఆదాయపు పన్నునే కోట్లలో చెల్లిస్తారని స్వయంగా పవన్ పలు దఫాలు చెప్పారు. అందుకని ఆయనకు డబ్బు అవసరం అంతగా ఉండదు. కష్టించి, సినిమాలు వరసగా చేస్తే ఆయనకు డబ్బు కొరత ఉండదు. కరెన్సీ కట్టలే ఆయన వద్దకు పరుగులు తీస్తాయి. ప్యాకేజీ తీసుకున్నారని ఎవరూ నమ్మకపోయినా చంద్రబాబు విషయంలో కొంత మెతక వైఖరిని అవలంబిస్తున్నారని మాత్రం అనుకోవాల్సి ఉంటుంది.

ఒక రాజకీయ పార్టీ పెట్టుకున్న తర్వాత సొంతంగా ఎదగాలని ఎవరైనా భావిస్తారు. ఒకరికి అండగా నిలిచి.. మరొకరిని ముఖ్యమంత్రిని చేయాలని ఎవరూ అనుకోరు. కానీ పవన్ మాత్రం ఆ విషయంలో కొంత ఫ్యాన్స్ ను కూడా నిరాశపరుస్తున్నారు. ఇక ఎప్పుడో దసరాకు తన పర్యటను ప్రారంభిస్తానని చెప్పారు. అయితే అది వాయిదా పడింది. తర్వాత వారాహి వాహనాన్ని సిద్ధం చేశారు. అదిగో వస్తున్నా... ఇదిగో వస్తున్నా అంటూ వాయిదా వేస్తూనే ఉన్నారు. ఒక డేట్ అంటూ ఇంతవరకూ ఫిక్స్ కాలేదు. దీంతో వైరిపక్షం విమర్శలు అందుకుంది. నారా లోకేష్ పాదయాత్ర ఒక కొలిక్కి వచ్చిన తర్వాత పవన్ కల్యాణ్ పాదయాత్ర మొదలు పెడతారంటూ అప్పటి వరకూ పీకే బస్సు యాత్రకు చంద్రబాబు పచ్చ జెండా ఊపరంటూ సోషల్ మీడియాలో హోరెత్తిపోతుంది.

అందులో నిజానిజాలు ఎంతనేది పక్కన పెట్టినా సాధారణ ప్రజలు వాస్తవమని అనుకునే అవకాశాలు లేకపోలేదు. వారాహికి పూజలు చేసిన పవన్ ఎందుకు బయలుదేరలేదంటే ఏం సమాధానం చెబుతారు? లోకేష్ పాదయాత్ర ప్రారంభమయిన నాటి నుంచి ఏపీకి పవన్ ఎందుకు రావడం లేదు? ఈ ప్రశ్నలకు ఆయనకు సమాధానం తెలియవచ్చు. కానీ జనాలకు మాత్రం తెలియదు కదా? అసలు బస్సు యాత్ర చేస్తానని ఎవరు ప్రకటించమన్నారు? ప్రకటిస్తే ఆ ప్రకటనకు కట్టుబడి ఉండాలి. అంతే తప్ప వాయిదాలు వేసుకుంటూ పోతే ఇలాంటి అపవాదులే ఎదుర్కొనాల్సి వస్తుంది. మరి పవన్ కల్యాణ్ విషయంలో జరుగుతున్న ప్రచారాన్ని ప్రజలు నమ్మకం.. నమ్మకపోవడం ఆయన చేతల ద్వారానే తెలుస్తుంది. అది పవన్ తెలుసుకుంటే మంచిదని సన్నిహితులు సూచిస్తున్నారు. కానీ పార్టీ నేతలు మాత్రం త్వరలోనే వారాహి యాత్ర ఉంటుందని చెబుతున్నారు.