ఉత్తరాంధ్రలో వలసలు ఇక ఉండవు

అన్నింటినీ అధిగమించి, అన్నీ అనుమతులు తీసుకుని తాము శంకుస్థాపన చేశామని, ఇక భోగాపురం ఎయిర్ పోర్టు పనులు శరవేగంగా పూర్తవుతాయని జగన్ హామీ ఇచ్చారు. రైతుల సహకారంతో వేలాది ఎకరాలు తీసుకుని ఈ ప్రాంతంలో అంతర్జాతీయ విమానాశ్రయంపై త్వరలోనే విమానాలు ఎగిరేలా చర్యలు తీసుకుంటున్నామని తెలిపారు. సాలూరులో డ్రైవర్ యూనివర్సిటీకి శంకుస్థాపన చేస్తామని తెలిపారు. వెనుకబడిన ఉత్తరాంధ్రను అభివృద్ధి చేయడమే లక్ష్యంగా తాను పనిచేస్తున్నాని జగన్ తెలిపారు. గత ప్రభుత్వానికి, ఈ ప్రభుత్వానికి తేడాను గమనించాలని కోరారు.

ఉద్దానంలో కిడ్నీ రీసెర్చ్ సెంటర్ ను కూడా త్వరలో జాతికి అంకితం చేస్తామని తెలిపారు. మరో రెండు నెలల్లోనే ఈ కార్యక్రమం పూర్తవుతుందని తెలిపారు. కిడ్నీ సమస్యలు తలెత్తకుండా ఇచ్ఛాపురం, పలాస వంటి ప్రాంతాల్లో రక్షిత తాగునీటి సౌకర్యాన్ని కూడా కల్పిస్తామని జగన్ తెలిపారు. ఈ జూన్ నెలలోగా తాగు నీటి పథకాన్ని ప్రారంభిస్తామని తెలిపారు. విశాఖ అందరికీ ఆమోదయోగ్యమైన నగరమని జగన్ తెలిపారు. ఉత్తరాంధ్రలో వలసలు అరికట్టేందుకు ఈ ప్రభుత్వం అన్ని రకాలుగా చర్యలు తీసుకుంటుందన్నారు. తాను కూడా సెప్టంబరు నుంచి విశాఖలోనే కాపురం పెడతామని మరోసారి జగన్ తెలిపారు.