పవన్ మనతోనే అన్న బాబు .. వైరల్...!!?

మాటల తూటాలు పేల్చేటప్పుడు ఒక్కోసారి తడబాటు నేతలను నవ్వులపాలు చేస్తుంది. ఈ విషయంలో ఏ నాయకుడు అతీతులు కాదు. ఆలాంటి వ్యాఖ్యల వీడియోలు సోషల్ మీడియా లో వైరల్ అవుతుంటాయి. ఇప్పటివరకు ఇలాంటి వైరల్ వీడియో ల రికార్డ్ మంత్రి నారాలోకేష్, అలాగే ఆయన మామ బాలకృష్ణ లదే. లోకేష్ పై బాలయ్యలపై ఆ తరువాత సెటైర్స్ బాంబుల్లా పేలేవి. ఇప్పుడు వీరి జాబితాలోకి ఎపి సిఎం కూడా వచ్చి చేరారు.

పవన్ కళ్యాణ్ కూడా ....

మహా కూటమి కట్టి తెలంగాణ జనంలోకి వెళ్ళిన ఎపి సీఎం ఫ్లో లో తడబడ్డారు. ఖమ్మంలో జరిగిన బహిరంగ సభలో ఆయన మాట్లాడుతూ తెలుగుదేశం, కాంగ్రెస్, తెలంగాణ జనసమితి, సిపిఐ, అదేమాదిరిగా జనసేన అంటూ కూటమిలో కలిపేయడం సభలో నవ్వులు పువ్వులు పూయించింది. గత ఎన్నికల్లో జనసేన, బిజెపి, టిడిపి ఒకే జట్టుగా తెలంగాణ ఎన్నికల్లో ప్రచారం ఉమ్మడిగా సాగించాయి. జనసేన అధినేత పవన్ కళ్యాణ్ కొంత కాలం క్రితం గుంటూరు సభలో బాబు ను తిట్టిన తిట్టు తిట్టకుండా తిట్ల దండకం అందుకుని టిడిపి పై యూటర్న్ తీసుకున్నారు. దాన్ని ఇప్పటికి బాబు జీర్ణించుకోలేక పోతున్నారు. జనసేన ఇంకా తమతోనే ఉందనే భావనలో ఉన్నారేమో ఆయన జనసేనను తమ కూటమిలో కలిపేశారు. అదేమాదిరిగా జనసేన అని తడబడ్డాకా తెలంగాణ జనసేన అంటూ కవర్ చేసే ప్రయత్నం చేశారు చంద్రబాబు. వాస్తవానికి తెలంగాణ ఎన్నికలకు జనసేన దూరంగా వుంది.

వాడేస్తున్న వైసిపి ...

బాబు టంగ్ స్లిప్ ను వైసిపి మీడియా బాగా ప్రచారంలో పెట్టింది. తన ఛానెల్ లో మనసులో మాట అంటూ పదేపదే చూపిస్తున్నారు. ఇక వైసిపి సోషల్ మీడియా లో కూడా చంద్రబాబు వ్యాఖ్య వైరల్ అయ్యింది. తెలంగాణ లో జోష్ తో ప్రచారం సాగిస్తున్న బాబు కు ఈ చమక్ కూడా బాగానే ప్రచారం తెచ్చిపెట్టింది.