అమరావతిపై కుల ముద్ర వేస్తారా?

రైతులు త్యాగం 33 వేల ఎకరాలు త్యాగం చేసిన ఫలితమే అమరావతి రాజధాని అని చంద్రబాబు అన్నారు. ఏమనుకుంటున్నారు మీరు? అమరావతిని మూడు ముక్కలు చేస్తారా? అని ప్రశ్నించారు. రైతులు 45 రోజుల పాటు పాదయాత్ర చేస్తే అక్రమ కేసులు పెట్టారన్నారు. 500 మందిని జైల్లోకి తోశారన్నారు. ఎన్నికలకు ముందు జగన్ ఏం చెప్పారో గుర్తు చేసుకోవాలన్నారు. అమరావతిని ఐదు కోట్ల మంది ప్రజలు కోరుకుంటున్నారన్నారు. అమరావతి పై దుష్ప్రచారం చేశారన్నారు. అమరావతి మునిగిపోతుందన్నారు. మూడేళ్లలో ఎక్కడైనా మునిగిందా? అని నిలదీశారు. అమరావతిలో ఉన్న భూమి మరెక్కడా లేదని ఐఐఐటీ చెన్నై నిపుణులు చెప్పారన్నారు. హైదరాబాద్ లో సైబరాబాద్ ను నిర్మించి దానిని అభివృద్ధి చేశామని చంద్రబాబు చెప్పారు.

ఇన్ సైడ్ ట్రేడింగ్ జరిగిందని తప్పుడు ప్రచారం చేశారన్నారు. మూడేళ్ల నుంచి ఎక్కడ జరిగిందో ఈ చేతకాని ప్రభుత్వం తేల్చలేకపోయిందన్నారు. రాజధాని అమరావతి రాష్ట్రానికి నడిబొడ్డున ఉందన్నారు. అన్ని ప్రాంతాలకు దగ్గరగా ఉందని అమరావతిని ఎంపిక చేస్తే దానిపై విమర్శలు చేస్తారా? అని చంద్రబాబు ఫైర్ అయ్యారు. శాసనసభ, హైకోర్టు, సెక్రటేరియట్ రైతుల భూముల్లోనే ఉందన్న విషయాన్ని గుర్తు పెట్టుకోవాలన్నారు. చేతకాక పోతే చేతకాదని చెప్పాలని, తాము అమరావతిని అభివృద్ధి చేసుకుంటామని చంద్రబాబు అన్నారు. అమరావతిని కాపాడుకుందామని, ఆంధ్రప్రదేశ్ ను రక్షించుకుందామని చంద్రబాబు పిలుపునిచ్చారు. ఒకే రాష్ట్రం ఒకే రాజధాని ఉండాలని ఆయన నినదించారు.