చరిత్రను వక్రీకరిస్తున్నారు.. మంటలు రగిలిస్తున్నారు

ఆంధ్రప్రదేశ్ ఏర్పడిన నాటి నుంచి తమను బానిసలుగా చూస్తున్నారన్న భావన తెలంగాణ ప్రజల్లో నెలకొందని ఆయన అన్నారు. కానీ పథ్నాలుగేళ్లు తాను ప్రత్యేక తెలంగాణ కోసం ఉద్యమించిన విషయాన్ని కేసీఆర్ గుర్తు చేశారు. అనేక పోరాటాలతో స్వరాష్ట్రం ఆవిర్భవించిందన్నారు. అన్ని పార్టీలను మెప్పించి, ఒప్పించి తెలంగాణను తెచ్చుకున్నామని తెలిపారు. ఎనిమిదేళ్లలో తెలంగాణలో అన్ని రంగాల్లో అభివృద్ధి చెందిందని అన్నారు. తెలంగాణ ప్రజల తలసరి ఆదాయం పెరిగిందన్నారు. రైతులకు ఉచిత విద్యుత్తును 24 గంటలూ అందిస్తున్న రాష్ట్రం దేశంలో తెలంగాణాయేనని తెలిపారు. కరువు కాటకాలతో అల్లాడిన తెలంగాణలో నేడు కోటి ఎకరాలకు సాగు నీరు అందించామని కేసీఆర్ అన్నారు. దేశానికి అన్నంపెట్టే అన్నపూర్ణగా మారిందన్నారు.

హరిత తెలంగాణగా తీర్చిదిద్దుకున్నామని తెలిపారు. పారిశ్రామికంగా తెలంగాణ రాష్ట్రం అభివృద్ధి చెందిందన్నారు. 2,32,111 కోట్ల పెట్టుబడులు తెలంగాణకు వచ్చాయన్నారు. ఐటీ రంగంలో ఉద్యోగాల సృష్టిలో తెలంగాణ దేశంలో మొదటి స్థానంలో ఉందన్నారు. అన్ని గ్రామాలకు మౌలిక వసతులు సమకూర్చామన్నారు. ప్రతి గ్రామంలో మౌలిక వసతులు కల్పించామని చెప్పారు. పల్లె ప్రగతిలో భాగంగా ప్రతి గ్రామంలో క్రీడా ప్రాంగణాలను ఏర్పాటు చేసుకుంటున్నామన్నారు. ఈ తరుణంలో మతతత్వ శక్తులు బయలుదేరి తెలంగాణ ప్రజలను చీల్చే ప్రయత్నం చేస్తున్నాయని అన్నారు. చిల్లర రాజకీయాలతో తెలంగాణ చరిత్రను కొందరు వక్రీకరిస్తున్నారన్నారు. దేశంలోనూ, రాష్ట్రంలోనూ మతోన్మాద శక్తులు పేట్రేగిపోతున్నాయన్నారు. విధ్వేషపు మంటలు రగిలించడం సమర్థనీయం కాదని కేసీఆర్ తెలిపారు. మానవ సంబంధాలను మంటగలిపే ప్రయత్నాలు చేస్తున్నారు. ఆనాటి చరిత్రతో, సంఘటనలతో సంబంధం లేని ఈ ఆషాఢభూతులు మలినం చేసే ప్రయత్నం చేస్తున్నారన్నారు. వీరి కుటిల ప్రయత్నాలను తిప్పికొట్టడం మనందరి ప్రధమ కర్తవ్యమని ఆయన అన్నారు. స్వార్థ రాజకీయాల కోసం నీచమైన ఎత్తుగడలకు పాల్పడుతున్నారని కేసీఆర్ అన్నారు.