జాతిరత్నాలకు ఇక తిరుగే లేదట

తెలంగాణా రాజకీయాల్లో జాతిరత్నాలు ఎవరంటే ఇప్పుడు టక్కున గుర్తుకొచ్చేది ఆ నలుగురు ఎమ్మెల్యేలే. మొయినాబాద్ ఫాంహౌస్ లో బీజేపీ బేరసారాలాడిందంటున్న నలుగురు ఎమ్మెల్యేలను రత్నాలుగా కేసీఆర్ అభివర్ణించడంతో వారికి సోషల్ మీడియాలో జాతిరత్నాలుగా ప్రశంసిస్తూ కొందరు, విమర్శిస్తూ మరికొందరు పోస్టులు పెడుతున్నారు. సరే ఇంతకీ ఈ ఎమ్మెల్యేలను నిజంగా కొనుగోలు చేయడానికి ప్రయత్నించారా? లేదా అదంతా డ్రామానా? అన్నది పక్కన పెడితే ఒకటి మాత్రం నిజం నలుగురు ఎమ్మెల్యేలు సేఫ్ జోన్ లో ఉన్నట్లే కనిపిస్తుంది. వచ్చే ఎన్నికల్లో తొలి జాబితాలో టిక్కెట్లు దక్కేది వీరేకనన్న కామెంట్స్ వినపడుతున్నాయి. నేరుగా ముఖ్యమంత్రి కేసీఆర్ వాళ్లను ప్రగతి భవన్ లో ఐదారు రోజులు పైగా ఉంచారు. వారి నుంచి అన్ని విషయాలు తెలుసుకున్నారు. దీంతో వారిపట్ల కేసీఆర్ కు మరింత వాత్సల్యం పెరిగిందని అంటున్నారు.