Mohan Babu : పెదరాయుడు ఇంట్లో "పెద్ద పంచాయతీ"

మంచు మోహన్ బాబు ఇంట్లో గొడవలు ఆస్తికి సంబంధించినవేనన్న ప్రచారం జరుగుతుంది. తిరుపతిలోని విద్యాలయానికి సంబంధించిన ఆస్తుల వివాదమే గొడవలకు కారణమని చెబుతున్నారు. మోహన్ బాబు తన ఆస్తులను పంచి పెట్టినప్పటికీ తిరుపతిలో ఉన్న ఆయన యూనివర్సిటీకి సంబంధించిన పంపకాలు జరగలేదని అంటున్నారు. ఈ నేపథ్యంలోనే మనోజ్ కు, మోహన్ బాబు మనుషులకు మధ్య గొడవలు జరిగినట్లు పెద్దయెత్తున నిన్నంతా ప్రచారం జరిగింది. కానీ మోహన్ బాబు టీం మాత్రం నిన్న ఈ మంచు కుటుంబంలో ఎలాంటి విభేదాలు లేవని, ఇంట్లో గొడవలు ఏమీ జరగలేదని వివరణ ఇచ్చే ప్రయత్నం చేసింది. ఆ ప్రచారాన్ని నమ్మవద్దని, తప్పుడు వార్తలు ప్రచురించవద్దంటూ కోరింది.

అయితే జరుగుతున్న పరిణామాలు మాత్రం జల్ పల్లిలోని మోహన్ బాబు ఇంట్లో మాత్రం ఏదో గొడవ జరిగిందని మాత్రం అర్థమవుతుంది. మంచు మనోజ్ గాయాలు పాలు కావడంతో పాటు ఈరోజు తిరిగి 30 మంది బౌన్సర్లు అక్కడకు చేరుకుంటుండటం కూడా ఈ ప్రచారానికి మరింత ఊతమిస్తుంది. దుబాయ్ లో ఉన్న మంచు విష్ణు మరికాసేపట్లో హైదరాబాద్ కు రానున్న నేపథ్యంలో ఈ గొడవలు మరింత పెరుగుతాయని అంటున్నారు. మోహన్ బాబు బయటకు వచ్చి దీనిపై వివరణ ఇస్తే తప్ప నిజనిజాలు తెలియకపోయినా, కోరికలే గుర్రాలయితే అంటూ ఆయన కూడా నిన్న చేసిన ట్వీట్ ఇందుకు మరింత ఊతమిస్తుందని చెప్పుకోవాలి. మొత్తం మీద మోహన్ బాబు ఇంట్లో గొడవలంటూ రెండు రోజులుగా జరుగుతున్న ప్రచారం అభిమానులకు ఇబ్బందికరంగా మారింది. ఇప్పటికైనా మంచు కుటుంబంలో వాస్తవాలు బయటకు చెప్పాలని కోరుతున్నారు.