బై బై గణేశా.. ముగిసిన ఖైరతాబాద్ గణేశ్ నిమజ్జనం

నిమజ్జనం పరిశీలించేందుకు వేల సంఖ్యలో ట్యాంక్‌బండ్ కు చేరుకున్నారు. హైదరాబాద్ నగరంలోని అనేక ప్రాంతాల నుంచి ఖైరతాబాద్ గణేశుడి విగ్రహం నిమజ్జనం చూసేందుకు తరలి రావడంతో ట్యాంక్ బండ్ ప్రాంతం కోలాహలంగా మారింది. వర్షం కురిసినా ప్రజలు ట్యాంక్‌బండ్ పైనే గణేష్ నిమజ్జనం చూసేందుకు నిలబడి ఓపిగ్గా వేచి చూశారు. పోలీసులు గట్టి బందోబస్తును ఏర్పాటు చేశారు. ట్యాంక్‌బండ్ పరిసర ప్రాంతాల్లోకి వినాయక విగ్రహాలు మినహా మరే వాహనాలను అనుమతించ లేదు. నిమజ్జనం ముగిసిన తర్వాత ఖైరతాబాద్ వైపునకు భక్తులు వెళ్లాలని పోలీసులు సూచిస్తున్నారు. మిగిలిన రహదారులు గణపతులతో కిక్కిరిసి పోయినందున ఖైరతాబాద్ వైపు మాత్రమే వెళ్లాలని పోలీసులు భక్తులను కోరుతున్నారు. ప్రశాంతంగా నిమజ్జనం ముగియడంతో పోలీసులు ఊపిరి పీల్చుకున్నారు.