జగన్ అప్పుల చిట్టా ఇదిగో...?

టీడీపీ రాజ్యసభ సభ్యుడు కనకమేడల రవీంద్ర కుమార్ అడిగిన ప్రశ్నకు ఆర్థిక శాఖ సహాయ మంత్రి భగవత్ కరాడ్ ఏ బ్యాంకుల నుంచి ఎంత రుణాన్ని ఏపీ ప్రభుత్వం తీసుకుందో వెల్లడించారు. ఏపీలో నలభై కార్పొరేషన్లకు, కంపెనీలకు జాతీయ బ్యాంకులు రుణాలు మంజూరు చేశాయని, వీటిని చెల్లించాల్సిన బాధ్యత కార్పొరేషన్లు, కంపెనీలదేనని కేంద్ర మంత్రి స్పష్టం చేశారు. గత రెండేళ్లుగా చేసిన అప్పుల చిట్టాను కేంద్ర మంత్రి విప్పారు.

ఎస్.బి.ఐ. నుంచి తొమ్మిది సంస్థలు 11,397 అప్పును, బ్యాంక్ ఆఫ్ బరోడా నుంచి ఐదు కంపెనీలు, కార్పొరేషన్లు కలపి 10,865 కోట్ల రుణాన్ని తీసుకున్నాయని కేంద్ర మంత్రి వెల్లడించారు. ఇక బ్యాంక్ ఆఫ్ ఇండియా నుంచి మూడు సంస్థలు ఏడు వేల కోట్లు, బ్యాంక్ ఆఫ్ మహారాష్ట్ర నుంచి 4 సంస్థలకు 2,970 కోట్లు, కెనరా బ్యాంకు నుంచి 4,099 కోట్లు, పంజాబ్ సింధ్ బ్యాంకు నుంచి 750 కోట్లు రుణం తీసుకున్నట్లు వెల్లడించారు. ఇండియన్ బ్యాంకు నుంచి 5,500 కోట్లు, ఇండియన్ ఓవర్సీస్ బ్యాంకు నుంచి 1,750 కోట్లు, పంజాబ్ నేషనల్ బ్యాంకు నుంచి 5,633, యూనియన్ బ్యాంకు నుంచి 6,975 కోట్ల రూపాయలను రుణం తీసుకున్నట్లు కేంద్ర మంత్రి వెల్లడించారు. దాదాపు యాభై వేల కోట్ల రూపాయలను జగన్ ప్రభుత్వం బ్యాంకుల నుంచి అప్పుగా తీసుకుంది.