KCR : సన్నాసులు సవాళ్లు విసురుతున్నారు.. అసెంబ్లీకి పంపేది ప్రజలా? వాళ్లా?

మేనిఫేస్టోలో తాను పెట్టింది పది పనులు చేసింది వంద పనులని ఆయన అన్నారు. సీతారామ ప్రాజెక్టు పూర్తయితే నాలుగు కోట్ల ఎకరాల్లో వడ్లు పండుతాయని తెలిపారు. రేషన కార్డు దారులందరికీ సన్నబియ్యమే ఇస్తామని తెలిపారు. పింఛన్లను కూడా పెంచి ఇచ్చి పేదలను ఆదుకుంటామని చెప్పారు. కాంగ్రెస్ వస్తే రైతు బంధు తీసేస్తారన్నారు. ధరణిని కూడా తొలగిస్తారని అన్నారు. వాళ్లొస్తే మూడు గంటలు మాత్రమే కరెంట్ వస్తుందని, అదే ఈ ప్రభుత్వం ఉంటే ఇరవై నాలుగు గంటలు విద్యుత్తు వస్తుందని ఆయన అన్నారు. ఎవరు కావాలో మీరే నిర్ణయించుకోవాలని, విజ్ఞతతో ఓటు వేయాలని కేసీఆర్ ఇల్లందు ప్రజలకు పిలుపు నిచ్చారు.

రానున్నది బీఆర్ఎస్ ప్రభుత్వమేనని అన్ని సమస్యలను ఒక్కొక్కొటి పరిష్కరించుకుంటూ వెళదామని అన్నారు. కాంగ్రెస్ హయాంలో రెండు వందల పెన్షన్ మాత్రమే ఇచ్చారన్నారు. కర్ణాటక మంత్రి ఒకరు ఇక్కడకు వచ్చి ఐదు గంటల విద్యుత్ ఇస్తామని చెప్పి వెళ్లారని, ఇక్కడ తాము ఆల్రెడీ 24 గంటల కరెంటు ఇస్తున్న విషయాన్ని వారు మర్చిపోయారన్నారు. లక్ష కుటుంబాలకు రైతు బీమా అందిందన్నారు. గిరిజనులకు 48 వేల ఎకరాల పోడు భూములను పంచి పెట్టామని తెలిపారు. వైద్య విధానంలో కూడా సమూలమైన మార్పులు తెచ్చామని తెలిపారు. కాంగ్రెస్ కు ఓటేస్తే మళ్లీ దళారుల రాజ్యం వస్తుందని కేసీఆర్ హెచ్చరించారు. మరోసారి తన ప్రభుత్వాన్ని ఆశీర్వదించాలని కేసీఆర్ కోరారు.