రేవంత్ ఒక్కడి వల్ల సాధ్యమవుతుందా?

మునుగోడు ఉప ఎన్నికలో కాంగ్రెస్ విజయం సాధిస్తే సార్వత్రిక ఎన్నికలకు కొంత పట్టు దొరుకుతుంది. ఆ సంగతి కాంగ్రెస్ మహామహులెవరికీ తెలియంది కాదు. తమకు కూడా రాజకీయంగా ఉపయోగపడుతుంది. కానీ మనసు పెట్టి ఉప ఎన్నికల్లో పార్టీని గెలిపించాలన్న ఆలోచన లేదు. ఎవరి ధోరణి వారిదే. కష్టపడరు. కానీ పదవులు మాత్రం కావాలంటారు. తమకు పార్టీలో ప్రాధాన్యత కోరుకుంటారు. కానీ ఉప ఎన్నికల్లో చెమటోడ్చే తత్వం ఎవరికీ లేదు. ఇన్ ఛార్జులుగా నియమించిన కొందరు నేతలు కూడా ఆషామాషీగా మునుగోడులో పర్యటిస్తున్నారు. కొందరు తాము ఈ ఎన్నిక బాధ్యతను నిర్వహించలేమని పక్కకు తప్పుకున్నారు.

రాష్ట్రం ఆవిర్భవించిన తర్వాత తెలంగాణలో జరిగిన అన్ని ఉప ఎన్నికల్లో కాంగ్రెస్ ఓటమి పాలయింది. ఒక్క నాగార్జున సాగర్ ఉప ఎన్నికల్లోనే గట్టి పోటీ ఇచ్చింది. అప్పుడు కూడా కాంగ్రెస్ నేతల్లో అనైక్యత కారణంగానే ఓటమి పాలయిందన్న విమర్శలున్నాయి. పార్టీ క్యాడర్ లో నైరాశ్యం అలుముకుంది. దాని నుంచి బయటపడాలంటే మునుగోడు ఉప ఎన్నికలో గెలవడం ముఖ్యం. వచ్చే ఎన్నికల్లో సమాయత్తమవ్వడానికి మునుగోడు ఉప ఎన్నికల్లో గెలుపు కాంగ్రెస్ కు టానిక్ లాంటింది. దీనిని కూడా కాంగ్రెస్ నేతలు సద్వినియోగం చేసుకోలేక పోతున్నారు. మునుగోడులో బలమైన ఓటు బ్యాంకు ఉన్నప్పటికీ కాంగ్రెస్ నేతలు పెద్దగా పట్టించుకోవడం లేదు. సీరియస్ నెస్ కొరవడింది. మునుగోడులో గెలిస్తే అది రేవంత్ ఖాతాలో పడుతుందని కొందరు ముందుగానే కాళ్లకు అడ్డం పడుతున్నారు. కొందరు మాత్రమే తమకు అప్పగించిన పనిని చేసుకు పోతున్నారు. అందరూ కలసి సమిష్టిగా మాత్రం పనిచేయడం లేదు.

రేవంత్ రెడ్డి పై అసంతృప్తిని ఉప ఎన్నికల్లో సీనియర్ నేతలు చూపుతున్నారు. అంతిమంగా నష్టపోయేది కాంగ్రెస్ పార్టీనేనన్న సంగతిని విస్మరిస్తున్నారు. రాహుల్ గాంధీ వరంగల్ వచ్చినప్పుడు క్లాస్ పీకినా ప్రయోజనం లేదు. హైదరాబాద్ కే ఎక్కువమంది నేతలు పరిమితమవుతున్నారు. రేవంత్ రెడ్డి రెక్కల కష్టమొక్కటి సరిపోదు. దానికి అన్ని రకాలుగా సహాయ సహకారాలు అందితేనే పార్టీకి బలం చేకూరుతుంది. ముందుగానే అభ్యర్థిని ప్రకటించారు. పాల్వాయి స్రవంతి మాత్రం ప్రజల వద్దకు నేతలతో సంబంధం లేకుండా వెళుతున్నారు. అభ్యర్థి ని ముందుగా ప్రకటించిన అడ్వాంటేజీని కూడా కాంగ్రెస్ వాడుకోలేకపోతుంది. రేవంత్ రెడ్డి కూడా క్రమం తప్పకుండా మునుగోడుకు వెళుతూ కార్యకర్తల్లో భరోసా కల్పిస్తున్నారు. ఇప్పటికైనా కాంగ్రెస్ నేతలు సమిష్టిగా పనిచేయగలిగితే.. రేవంత్ రెడ్డికి సహకరించగలిగితే మునుగోడులో సక్సెస్ పెద్ద కష్టమేమీ కాదన్నది రాజకీయ విశ్లేషకుల అంచనా.