సభకు వెళ్లను.. ప్రజాక్షేత్రంలోనే తేల్చుకుంటా

ఎనిమిది సార్లు ఎమ్మెల్యేగా ఎన్నికయ్యాను. 38 ఏళ్లుగా సభకు వస్తున్నాను. విమర్శలు, ప్రతి విమర్శలు చేసుకున్నాం. ఓడిపోయాం. గెలిచాం. ఓడిపోయినప్పుడు కుంగిపోలేదు. గెలిచినప్పుడు రెచ్చిపోలేదు. నేను ఎప్పుడూ అవహేళనగా మాట్లాడలేదు. ఎంతో మంది నాయకులతో పనిచేశాను. జాతీయ రాజకీయాల్లో కూడా ఉద్దండులైన వారితో కలసి పనిచేసే అవకాశం నాకు దక్కింది. ప్రజల కోసం చేసేది రాజకీయం అని నేను నమ్మాను.

హైదరాబాద్ ను అభివృద్ధి చేశాను. ఇక్కడ కూడా అభివృద్ధి చేసి గర్వంగా ఫీలయ్యాను. అంతర్జాతీయ స్థాయిలో ప్రశంసలు అందుకున్నాను. ఎప్పుడూ నా భార్య రాజకీయాల్లోకి రాలేదు. ఎన్టీఆర్ ముఖ్యమంత్రిగా ఉన్నప్పుడు కూడా ఆమె రాజకీయాలను పట్టించుకోలేదు. టీడీపీ ఓటమి పాలయినా తనను ప్రోత్సహించిందే తప్ప ఏరోజూ రాజకీయాల్లో జోక్యం చేసుకోలేదు. ఈ కౌరవ సభ, గౌరవం లేని సభలో ఉండటం వృధా. అందుకే ఈ నిర్ణయం తీసుకున్నాను. ధర్మానికి, అధర్మానికి పోరాటం. ప్రజాక్షేత్రంలోనే నిర్ణయించుకుంటాను. నాకు సీఎంగా ఉండాలన్న కోరిక లేదు. గౌరవంగా బతికే వ్యక్తులను బజారు కీడ్చే ఈ రాజకీయాలు వేధిస్తున్నాయి. అని తెలుగుదేశం పార్టీ అధినేత చంద్రబాబు నాయుడు మీడియా సమావేశంలో మాట్లాడారు.