గ్యాప్ వచ్చింది అందుకేనా?

నిజానికి తెలంగాణ గవర్నర్ ప్రభుత్వానికి పెద్దగా ఇబ్బంది కలిగించిన అంశం ఏమీలేదనే చెప్పాలి. ఒకే ఒక అంశాన్ని గవర్నర్ ప్రశ్నించారు. ఫైలును కొన్నాళ్లు తొక్కిపెట్టారు. హుజూరాబాద్ ఉప ఎన్నిక నేపథ్యంలో పాడె కౌశిక్ రెడ్డికి ఎమ్మెల్సీ పదవి ఇవ్వాలనుకున్న కేసీఆర్ గవర్నర్ కోటాలో ఎమ్మెల్సీ చేయాలనుకున్నారు. మంత్రివర్గం ఆమోదించి గవర్నర్ కు ఫైలు పంపితే సేవా కేటగిరి కింద కౌశిక్ రెడ్డి రాడని భావించి గవర్నర్ తమిళిసై ఆ ఫైలును తొక్కిపెట్టారు.

అయితే గవర్నర్ ఈ ఫైలును క్లియర్ చేయరని భావించి కౌశిక్ రెడ్డిని ఎమ్మెల్యే కోటాలో ఎమ్మెల్సీని చేశారు కేసీఆర్. నిజానికి కౌశిక్ రెడ్డి నియామకంలో గవర్నర్ వాదనతో కేసీఆర్ కూడా ఏకీభవించినట్లు తెలిసింది. గవర్నర్ తో విభేదాలు ఈ ఫైలు కారణం కాదు. ప్రశాంత్ కిషోర్ వ్యూహరచనలో భాగంగానే ప్రభుత్వం గవర్నర్ ను టార్గెట్ చేసినట్లు చెబుతున్నారు. గవర్నర్ ఎంత రెచ్చిపోతే తమకు అంత లాభమన్న అంచనాలో ఉన్నారు. గవర్నర్ కూడా నేడు ఢిల్లీలో కేంద్ర హోంమంత్రి అమిత్ షాను కలవనున్నారు. ఆ తర్వాత గవర్నర్ కూడా దూకుడు పెంచే అవకాశముంది.

అన్ని రకాలుగా వ్యూహాలను సిద్ధం చేసి హ్యాట్రిక్ విజయాన్ని సాధించేందుకు కేసీఆర్ సిద్ధమవుతున్నారు. గవర్నర్ ప్రభుత్వానికి వ్యతిరేకంగా మరిన్ని నిర్ణయాలు తీసుకోవాలని కేసీఆర్ ఆకాంక్షిస్తున్నారు. పాలనను రాజ్ భవన్ నియంత్రిస్తుందన్న సంకేతాలను ప్రజల్లో బలపడాలని కేసీఆర్ కోరుకుంటున్నారు. దీనివల్ల తమ పార్టీకి దూరమైన కొన్ని వర్గాలు తిరిగి దగ్గరయ్యే అవకాశాలున్నాయని కేసీఆర్ భావిస్తున్నారు. నిజానికి రాజ్ భనవ్ తో పెద్దగా విభేదాలు లేకపోయినా గవర్నర్ టార్గెట్ వెనక కోల్ కత్తా వ్యూహమే దాగి ఉందని చెబుతున్నారు.